बाँके असार ३ गते ।
बाँकेको कोहलपुर नगरपालिकामा आयोजना गरिएको तीन दिने उद्घोषण तालिम आज सकिएको छ ।
कोहलपुर नगरपालिका महिला बालबालिका तथा जेष्ठ नागरिक शाखाको आयोजनामा नगर बालसंजाल क्लवका सदस्यहरुका लागि तालिम आयोजना गरिएको थियो ।
तालिममा बोल्न सक्ने सीपका विभिन्न विषयमा पत्रकार महासंघ लुम्बिनी प्रदेशका उपाध्यक्ष शुक्रऋषि चौलागाई र रेडियो बागेश्वरी एफएमका समाचार प्रमुख प्रियास्मृति ढकालले प्रशिक्षण दिनुभएको थियो ।
समापन अवसरमा बोल्दै कोहलपुर नगरपालिका महिला बालबालिका तथा जेष्ठ नागरिक शाखाका प्रमुख रिना थापाले उद्घोषण कला व्यक्तिको नेतृत्वका विकासका लागि पनि महत्वपूर्ण रहेकाले सिकेका सीपलाई व्यवहारिकरुपमा कार्यान्वयनमा ल्याउन बाल बालसंजाल क्लवका सदस्यहरुलाई सुझाव दिनुभयो ।
तालिम समापनका अवसरमा प्रशिक्षक चौलागाई, नगरस्तरीय बाल क्लवका पूर्वअध्यक्ष रमेश वर, सहभागीका तर्फबाट स्मारीका थापा, दिपक केसीलगायतले बोल्नुभएको थियो ।
Discussion about this post