बाँके असार ३ गते ।
सीमावर्ती भारतीय बजार रुपैडियामा एकजना मृत अवस्थामा फेला परेका छन् । रुपैडियाको मुनिरगंज सट्टास्थित तलाउमा मृत भेटिएको व्यक्तिको साथमा नेपाली मतदाता नामावलीको दुई वटा परिचय पत्र फेला परेको छ ।
मृतकको साथबाट नेपालगन्ज उपमहानगरपालिका–११ का समिर जसगढ र सैजहा जसगढको मतदाता नामावली परिचय पत्र फेला परेको भारतीय प्रहरीले जानकारी दिएको छ ।
मृतक र परिचय पत्रमा नाम उल्लेख भएका व्यक्ति फरक फरक भएको नाकामा रहेको नेपाल प्रहरीका वरिष्ठ सई माधव रिजालले जानकारी दिनुभयो ।
मृतकको साथमा भेटिएको परिचय पत्रमा नेपालगन्ज उपमहानगरपालिका वडा नम्वर ११ समिर जसगढ उल्लेख छ । नेपालगन्ज वडा नम्वर ११ मा सम्पर्क गर्दा समिर जसगढ सम्पर्कमा आएको वरिष्ठ सई रिजालले बताउनुभयो ।
मृतक नेपाली हुन की भारतीय हुन यकिन हुन सकेको छैन् । भारतीय प्रहरीले शवलाई पोष्टमार्टमका लागि चिकित्सालय बहराइच पठाएको जनाएको छ।
Discussion about this post