बाँके असार ९ गते ।
नेपालगन्ज उपमहानगरपालिकाले आफ्नो नीति तथा कार्यक्रम र बजेट सार्वजनिक गरेको छ ।
नेपालगन्ज उपमहानगरपालिकाको ११ औं नगर सभामा आज नगर प्रमुख प्रशान्त विष्टले नीति तथा कार्यक्रम र नगर उपप्रमुख कमरुद्दिन राइले बजेट प्रस्तुत गर्नुभएको हो ।
नेपालगन्जस्थित भेरी प्राविधिक शिक्षालयमा आयोजित नगर सभामा नगर प्रमुख विष्टले आगामी आर्थिक वर्ष २०७९/८० का लागि नीति तथा कार्यक्रम प्रस्तुत गर्नुभएको थियो भने नगर उप प्रमुख राईले आगामी आर्थिक वर्षका लागि कुल एक अर्व ६३ करोड ६५ लाख ७२ हजार ४ सय रुपैयाँ बराबरको बजेट प्रस्तुत गर्नुभएको थियो ।
आर्थिक वर्ष ०७७/७८ मा उपमहानगरपालिकाको आन्तरिक राजश्वतर्फ १७ करोड ४१ लाख १० हजार आय अनुमान गरिएकोमा कोरोनाका कारण राजश्व क्षमतामा कमी आइ १४ करोड एक लाख ५० हजार ५ सय ७ रुपैयाँ ५८ पैसा असुल भइ करिव ८१ प्रतिशत लक्ष्य हासिल भएको थियो ।
यस आर्थिक वर्षका लागि अनुमानित १४ करोड ७ लाख रुपैयाँ मात्र भएकोमा हालसम्म १३ करोड ४० लाख ५३ हजार ३ सय १४ रुपैयाँ संकलन भएको छ ।
यो वर्षको हालसम्मको आम्दानीको स्थितिले आन्तरिक स्रोत अनुमानको शतप्रतिशत लक्ष्य प्राप्त हुने देखिएको छ । आगामी आर्थिक वर्षको आन्तरिक आय १५ करोड ६९ लाख १० हजार रुपैयाँ प्रस्ताव गरिएको छ ।
नेपालगन्जको कूल आम्दानीको अधिकांश भार केन्द्रीय सरकार, प्रदेश सरकारबाट प्राप्त हुने अनुदानबाट आन्तरिक राजश्वको दायरा बढाई आन्तरिक स्रोत बृद्धि गर्ने कार्यक्रमलाई अभियानकै रुपमा अगाडि बढाएर कार्यान्वयन गर्नुपर्ने देखिएको छ ।
आर्थिक वर्ष ७७/७८ मा व्ययतर्फ चालू खर्च ८९ करोड ८१ लाख ९९ हजार ८ सय २० रुपैयाँ विनियोजन भएकोमा ७७ करोड ५९ लाख ४५ हजार ५ सय ३६ रुपैयाँ मात्रै खर्च भएको थियो ।
पूँजीगत खर्च ८१ करोड ३१ लाख ९३ हजार एक सय १८ रुपैयाँ विनियोजन भएको छ । वित्तिय व्यवस्थापनतर्फ तीन करोड १० लाख रुपैयाँ विनियोजन गरेर खर्च गरिएको थियो ।
चालु आर्थिक वर्षको असार ७ गतेसम्म एक अर्व ७ करोड ४ लाख २९ हजार ५ सय ९७ रुपैयाँ मध्ये ७२ करोड ७५ लाख ८२ हजार ७ सय २१ रुपैयाँ पेश्कीसहितको खर्च भएको छ । पूँजीगत तर्फ ६८ करोड ७ लाख ७२ हजार एक सय ७१ रुपैयाँ विनियोजन भएकोमा २४ करोड २४ लाख २० हजार खर्च भएको छ।
वित्तियतर्फ ४ करोड रुपैयाँ विनियोजन गरिएकोमा एक करोड ७८ लाख ५२ हजार २ सय ९१ रुपैयाँ खर्च भएको छ ।
यस्तै नेपालगन्जमा एक सय आठ फिट अग्लो हनुमानको मूर्ति बन्ने भएको छ । नीति तथा कार्यक्रममा एक सय आठ फिट अग्लो हनुमानको मूर्ति बनाउने उल्लेख गरिएको छ ।
नेपालगन्ज शहरको फरक पहिचान हुने गरी एक सय आठ फिट अग्लो हनुमानको मूर्ति निर्माण कार्य अगाडि बढाइने विष्टले बताउनुभयो । नेपालगन्ज उपमहानगरपालिकाको नीति तथा कार्यक्रममा प्राचीन टाँगाको संरक्षण र सम्वद्र्धन गर्ने उल्लेख गरिएको छ । विगतमा नेपालगन्जको यात्रुवाहक सवारी साधन टाँगा नै थियो ।
नयाँ–नयाँ मोडलका साना ठूला विद्युतीय यात्रुवाहक सवारी साधन आएपछि टाँगा लोप हुँदै गएको छ ।
मेयर प्रशान्त विष्टले सार्वजनिक गरेको नीति तथा कार्यक्रममा बागेश्वरी मन्दिरको संरक्षण, सम्वद्र्धन, सौन्दर्यकरणसहित बागेश्वरी क्षेत्र विकास कोषको स्थापना गर्न गुरुयोजना बनाइने, नगरभित्रका तालतलैयाको संरक्षण गर्ने, नेपालगन्जलाई क्लीन, ग्रिन र हेल्थी सिटीको रुपमा विकास गर्ने, पार्किङको व्यवस्थापन गर्ने, बजार क्षेत्रलाई फ्रि वाइफाइ जोनको रुपमा विकास गर्ने, महेन्द्र बहुमुखी क्याम्पसलाई विश्वविद्यालय बनाउन पहल गर्ने, भातृ भाषामा पठनपाठनका लागि आवश्यक पाठ्यक्रम निर्माण गरी कार्यान्वयन गर्ने, नेपालगन्जलाई मेडिकल हबको रुपमा विकास गर्ने, दूध, तरकारी, फलफूल र मासुमा आत्मनिर्भर बनाउने, ईरिक्सा व्यवस्थापन गर्नेलगायत समेटिएको छ ।
Discussion about this post