बाँके भदौ १२ गते ।
नेपालगञ्ज उपमहानगरपालिकाले आफ्नो क्षेत्रमा रहेको सरकारी जमिनको पहिचान गर्न सुरु गरेको छ ।
नेपालगञ्ज उपमहानगरपालिकाले आज पत्रकारसँगको अन्तरक्रिया कार्यक्रमको आयोजना गरी नेपालगञ्जको चाइना बजारको डेढ कठ्ठा बढी जग्गा सरकारी भएको पुष्टि गर्दै नियन्त्रणमा लिएको जनाएको छ । नगर प्रमुख प्रशान्त विष्टले त्रिवेणी मोड नजिकैको २५ नम्वर कित्ताको उक्त जग्गा नेपालगञ्ज उपमहानगरपालिकामा फर्काउने प्रक्रिया सुरु गरिएको जानकारी दिए ।
उक्त जमिन चलनचल्तीका हिसाबले १० करोड बढी मूल्यको भएको बताइएको छ । चाइना बजारको उक्त जग्गा चार जना व्यक्तिको नाममा लैजाने अन्तिम कानुनी प्रयास भइरहेको थियो ।
व्यापारिक प्रयोजनमा प्रयोग गरिएको उक्त जग्गामा ३४ जना व्यवसायी छन् । उनीहरुले तिनै चार जनालाई भाडा बुझाउने गरेका थिए । यसअघिका जनप्रतिनिधिले हँचुवाको भरमा नगरपालिकाको बोर्डबाट निर्णय गरेर भोगचलन गरिरहेको व्यक्तिलाई त्यहाँको जमिनको भाडा समेत उठाउने भनेको देखिएको छ । भदौदेखि भने उपमहानगरपालिकामा भाडा बुझाउन निर्देशन दिइसकेको नगर प्रमुख विष्टले बताए ।
उपमहानगर क्षेत्रमा सरकारी जमिन र अतिक्रमित जमिन कति छ भन्ने एकिन विवरण पनि उपमहानगरपालिकासँग छैन । यसले यहाँको धेरै सरकारी जमिन नागरिकले हडप्दै गएको देखिएको छ । विष्टले अबको तीन महिनाभित्र उपमहानगर क्षेत्रमा भएको सरकारी जमिनको खोजी गरी एकिन विवरण सार्वजनिक गर्ने बताए ।
यस्तै नगर उपप्रमुख कमरुद्दिन राइले यसअघिका जनप्रतिनिधिको हँचुवाको बोर्ड निर्णयका कारण अहिले समस्या उत्पन्न भएको बताए । आर्थिक चलखेलका कारण यसअघिको जनप्रतिनिधिको बोर्डले उक्त जमिन अरुलाई नै दिने निर्णय गरेको पनि उनको आरोप छ ।
Discussion about this post