बाँके फागुन ४ गते ।
विभिन्न अपराधमा संंलग्न रहेको आरोपमा पक्राउ परेका ६ जनालाई बाँके प्रहरीले आज सार्वजनिक गरेको छ । जिल्ला प्रहरी कार्यालयमा आज पत्रकार सम्मेलनको आयोजना गरी नक्कली नोट र लागु औषध कारोवारमा संलग्न रहेको आरोपमा पक्राउ परेका उनीहरुलाई प्रहरीले सावर्जनिक गरेको हो ।
नेपालगञ्जबाट ५ लाख भन्दा बढी नेपाली नक्कली नोटसहित तीन जनालाई प्रहरीले पक्राउ गरेको थियो । प्रहरीले नेपालगञ्ज उपमहानगर–२ स्थित न्युरोडबाट उनीहरूलाई पक्राउ गरेको हो ।
बाँकेका प्रहरी नायब उपरीक्षक रामप्रसाद घर्तीका अनुसार पक्राउ पर्नेमा कोहलपुर नगरपालिका–११ का ३३ वर्षीय मोहन कुमाई, अछामको तुर्माखाँद गाउँपालिका–३ का ३७ वर्षीय दीपक बिसी र सल्यानको वनगाँड कुपेण्डे नगरपालिका–५ का ३० वर्षीय मोहन राना छन्। उनीहरूको साथबाट प्रहरीले एक हजारका नक्कली नोट ५ सय ६९ थान बरामद गरेको छ ।
रानाको साथबाट चार सय १८ थान नक्कली नेपाली १ हजारको नोट र कुमाईको साथबाट १ सय ५१ थान नेपाली एक हजारको नक्कली नोट बरामद गरिएको छ । नक्कली नेपाली रुपैयाँ बोकेर हिँडिरहेका तीनै जनालाई मङ्गलबार साँझ प्रहरीको विशेष टोलीले पक्राउ गरेको हो ।
यसैगरी नेपालगन्ज उपमहानगरपालिका १ धम्वोजीबाट लागु औषध मुद्दामा तीन जना पक्राउ परेका छन् । ५० ग्राम ब्राउन सुगरसहित रुकुम पश्चिम सानोभेरी नगरपािलका ११ का २८ वर्षका तिलक डाँगी, वडा नम्वर ५ का ३३ वर्षका सोभिजंग केसी र २५ वर्षका विनोदकुमार गौतम रहेका छन् । उनीहरुलाई म्याद थपेर थप अनुसन्धान भइरहेको डिएसपी घर्तिले बताउनुभयो ।
Discussion about this post