बाँके असोज २० गते ।
नेपालगन्जबाट भारतको नयाँ दिल्लीसम्म नेपाली बसहरु चल्ने गरेका छन् । नेपालीहरुलाई आउजाउमा सहजहोस् भन्ने उद्देश्यका साथ चल्ने यस्ता बसहरु अवैध तस्करीमा प्रयोग हुन थालेका छन् ।
नेपाल–भारत मैत्री यात्रुवाहक बसबाट प्रहरीले करिब ५ लाख मुल्य बरावरको अवैध सामान बरामद भएपछि घटना बाहिरीएको हो ।
नेपालगन्जमा लागेको निषेधाज्ञा र कर्फ्युको मौका छोपेर तस्करहरू सक्रिय बनेको पाइएको छ । सुरक्षा निकायको ध्यान नेपालगन्जलाई शान्त बनाउनेतर्फ केन्द्रित भएका बेला सोही मौका छोपेर तस्करी र अवैध आयात बढेको स्थानीयको बुझाइ छ । तर प्रहरीले अवैध तस्करी नियन्त्रणमा सक्रियता पनि देखाइरहेको छ ।
नेपालगन्जबाट भारतको नयाँ दिल्लीसम्म आवागमन गर्ने ना ६ ख २५६२ नम्बरको बसबाट अवैध सामान बरामद भएको बाँकेका एसपी सन्तोषसिंह राठौरले जानकारी दिनुभयो । भारतको नयाँ दिल्लीबाट नेपालगन्ज आउँदै गरेको यात्रुवाहक बसबाट प्रहरीले ४ लाख ६८ हजार रमुल्य बराबरको भन्सार राजस्व छलेको कपडा र मोटरसाइकलका पार्टस्हरु बरामद गरेको एसपी राठौरको भनाई छ ।
बसको मुनि पछाडिको पाङ्ग्रानजिकको ठाउँमा गोप्य बाकस बनाएर कसैले थाहा नपाउने र शङ्का समेत नगर्ने हिसाबले अवैध सामान भरेर नेपालगन्ज भित्र्याइको अवस्थामा प्रहरीले बरामद गर्न सफल भएको बाँकेका प्रहरी प्रवक्ता डिएसपी नारायण डाँगीले बताउनुभयो ।
उहाँले नेपाल–भारत नाकामा रहेका भारततर्फका दुई चेकपोष्ट र नेपालतर्फका जमुनाहा, भन्सार र सशस्त्र प्रहरीको चौलिकास्थित गरेर तीनवटा चेकपोष्ट पार गरेर ट्राफिक चोकमा पुगेपछि सो बसबाट उक्त सामान बरामद गरिएको पनि जानकारी दिनुभयो ।
सो बसको मुनिपट्टि गोप्य बाकस बनाएर तस्करीका सामान नेपालबाट भारत लैजाने र भारतबाट नेपाल ल्याउने गरिएको सूचनाका आधारमा बसलाई नेपालगन्जस्थित ट्राफिक चोकमा रोकेर खानतलासी गर्दा सो अवैध सामान बरामद भएको उहाँको भनाई छ ।
डिएसपी डाँगीले बस र सामानलाई नेपालगन्ज भन्सार कार्यालयमा बुझाएर घट्नाको अनुसन्धान गर्ने कार्य भइरहेको बताउनुभयो । नेपालगन्ज मात्र नभई यसरी नेपाल–भारत रुटमा चल्ने मैत्रीबसबाट अन्य सीमा नाकाहरूमा समेत पटक पटक तस्करीको सामान बरामद हुँदैआएको छ ।
उता, केही दिन यता विवाद भएर नेपालगन्ज अशान्त भएको र सो नियन्त्रण गर्न अधिकांश सुरक्षाकर्मीलाई खटाइएको हुँदा सीमापारिबाट हुने तस्करी बढेको प्रहरीले जनाएको छ ।
Discussion about this post