बाँके पुस ७ गते ।
प्रथम किशोर सिंह राठौर यु–१६ कप क्रिकेट शनिबारदेखि नेपालगन्जमा सुरु हुदैछ । नेपालगन्जको मंगलप्रसाद उच्च माविको खेल मैदानमा हुन लागेको प्रतियोगिताको सम्पुर्ण तयारी पुरा भएको आयोजक ज्योति स्पोर्टस एकेडेमीले जनाएको छ ।
प्रतियोगितामा बाँकेका १७ टिमले प्रतिस्पर्धा गर्ने भएका छन् । आयोजक ज्योति स्पोर्टस एकेडेमीका अध्यक्ष सिद्धान्तजंग शाहीले बाँकेबाट जुनियर क्रिकेटर उत्पादन गर्नको लागि प्रतियोगिता आयोजना गरिएको बताए । उनले भने,‘प्रतियोगिताको तयारी पुरा भएको छ । धेरै पछि मंगलप्रसाद उच्च माविकामा क्रिकेट हुँदैछ ।
यसले प्रतिभावान खेलाडी उत्पादनमा सहयोग गर्नेछ ।’ प्रतियोगिताको समुह ‘ए’ मा जिभिएन, एबिसी, ड्रिमल्यान्ड, सेन्ट जेभिर्यस, फुल्टेक्रा मावि, श्रीचन्द्र मेवालाल, बागेश्वरी एकेडेमी कोहलपुर र मंगल प्रसाद उच्च मावि रहेका छन् । यसैगरी समुह ‘बी’ मा सिद्धार्थ विद्या सदन, जय बागेश्वरी, ब्राइटल्यान्ड, नेपालगन्ज मोडेल एकेडेमी, पशुपति हाईस्कुल, आदर्श, मोर्डन, महेन्द्र र आइडियल पब्लिक स्कुल रहेका छन् । प्रतियोगितामा सहभागि टिमलाई दुई समुहमा विभाजन गरेर नकआउटको आधारमा प्रतिस्पर्धा गराउने तयारी गरिएको छ ।
प्रतियोगिताको विजेताले ५० हजार, उपविजेताले ३० हजार, उत्कृष्ट खेलाडीले १० हजार, उत्कृष्ट वलर, उत्कृष्ट फिल्डर, उत्कृष्ट ब्याटसम्यानले समान ५ हजार रुपैयाँ पाउनेछन् । प्रत्येक खेलको प्लेयर अफ द म्याचले १ हजार पुरस्कार पाउनेछ । शनिबार विहान प्रतियोगिताको उद्घाटन संघीय सांसद एवम् नेपाली कांग्रेसका सह–महामन्त्री किशोर सिंह राठौरले गदैछन् ।
Discussion about this post