बाँके पुस ७ गते ।
बाँकेको राप्तीसोनारी गाउँपालिकामा सुगर (मधुमेह), प्रेसर (उच्च रक्तचाप) र मिर्गौलाका २०६ जनाले सेवा लिएका छन् । लुम्विनी प्रदेश सरकार स्वास्थ्य मन्त्रालय, स्वास्थ्य सेवा विभाग, स्वास्थ्य कार्यालय बाँकेको आयोजना र राप्तीसोनारी गाउँपालिकाको समन्वयमा वडा नं.८ को आभारभूत स्वास्थ्य केन्द्र शम्शेरगन्जमा भएको मधुमेह, उच्च रक्तचाप र मिर्गौला रोग स्क्रिनिङ शिविरमा २०६ जनाले सेवा लिएको स्वास्थ्य कार्यालय बाँकेका सूचना अधिकारी नरेश श्रेष्ठले जानकारी दिए ।
‘नसर्ने रोगीको पहिचान गर्नका लागि राप्तीसोनारी गाउँपालिकाका दुई वटा वडामा स्क्रिनिङ शिविर राख्ने योजना अनुसार शुक्रबार शम्शेरगन्जमा गरिएको हो उनले भने–‘४० वर्ष नाघेका नागरिकहरुलाई लक्षित गरेर आयोजना गरिएको शिविरमा २०६ जनाले सेवा लिनुभएको छ । त्यसमा कुन रोगका कति जना भन्ने तथ्यांक मिलाउँदै छौं ।’ मधुमेह, उच्च रक्तचाप र मिर्गौलाका नयाँ रोगी खोज्न आयोजना गरिएको स्क्रिनिङ शिविर निकै उपयोगी भएको भन्दै वडा अध्यक्ष शालिकराम डाँगीले निरन्तरताको खाँचो औल्याए ।
नसर्ने रोगका कारण मानिसहरुको अकालमा ज्यान जाने गरेको भन्दै सुरुवाती चरणको चेकजाँच जरुरी रहेको बताए । ‘समुदायमा जाँच नभइ पत्ता लाग्न नसकी लुकेर रहेका मधुमेह, उच्च रक्तचाप तथा मिर्गौलाका नयाँ रोगी पत्ता लगाउनका लागि स्क्रिनिङ शिविरको आयोजना गरिएको हो‘ सूचना अधिकारी श्रेष्ठले भने । पुस ८ गते आइतवार बिनौना स्वास्थ्य चौकीमा यस्तै शिविर राखिएको छ । नयाँ बिरामी पत्ता लगाउने अभियान भएकाले निदान भइसकेका, औषधी खाइरहेका र पुराना बिरामीको शिविरमा स्वास्थ्य चेकजाँच नहुने पालिकाका स्वास्थ्य शाखा प्रमुख देवेन्द्र केसीले जानकारी दिए ।
उनले मधुमेह, उच्च रक्तचाप र मिर्गौला रोगको शंका लागेका बिरामीले भने शिविरमा लाभ लिन सक्ने बताए । शुक्रबारको शिविरमा राप्तीसोनारी गाउँपालिकाका स्वास्थ्य शाखा प्रमुख देवेन्द्र केसीको नेतृत्वमा आभारभूत स्वास्थ्य केन्द्र शम्शेरगन्जका स्वास्थ्यकर्मी तथा स्वास्थ्य कार्यालय बाँकेको तर्फबाट जनस्वास्थ्य अधिकृत समेत रहेका सुचना अधिकारी श्रेष्ठ, ल्याव टेक्निसियन केशव ज्ञवाली, जनस्वास्थ्य निरीक्षक देव नारायण उपाध्याय, कोल्डचेन निरीक्षक जनक गिरी, तथ्यांक अधिकृत मदन पाल, लेखा अधिकृत धनबहादुर चन्द लगायतको टोलि खटिएको थियो ।
Discussion about this post