बाँके पुस २३ गगे ।
बाँके ट्राफिक प्रहरीले चालकहरुलाई जिम्मेवार बनाउने अभियान थालेको छ । बढ्दो दुर्घटना न्यूनीकरणमा चालकहरुको भूमिका र जिम्मेवारी महत्वपूर्ण हुने भएकाले ट्राफिक प्रहरीले चालकहरुका जिम्मेवार बनाउन १२ बुँदे प्रतिज्ञा गराएको छ । जिल्ला ट्राफिक प्रहरी कार्यालयले सोमवार नेपालगन्ज वसपार्कमा सडक सुरक्षा तथा ट्राफिक सचेतना कार्यक्रमको आयोजना गरी चालकहरुलाई प्रतिज्ञा गर्न लगाइएको बाँकेका ट्राफिक प्रहरी प्रमुख गोपीकृष्ण सुवेदीले बताए ।
कार्यक्रममा सहभागि बाँकेका प्रहरी प्रवक्ता डिएसपी नारायण डाँगीले दुर्घटना न्यूनीकरणका लागि चालकहरुको महत्वपूर्ण भूमिका हुने बताए । उनले चालक पेशा अत्यन्तै जिम्मेवार र अनुशासित हुनुपर्नेमा जोड दिँदै उक्त जिम्मेवारीलाई कुशलतापूर्वक निर्वाह गर्न आवश्यक रहेको बताए । ‘चालक पेशा जिम्मेवार र मर्यादित पेशा हो उनले भने–‘यसलाई कुशलतापूर्वक निर्वाह गर्न जिम्मेवार चालक बन्ने प्रतिज्ञा गर्नुपर्छ ।’ प्रहरीको भूमिका भनेकै मानिसहरुको जीउधनको सुरक्षा गर्नु भएको पनि उनले बताए ।
उनले जीउज्यानको सुरक्षा भनेको ट्राफिक प्रहरी व्यवस्थापन पनि भएको बताए । उनले ट्राफिक सचेतनाबारे आम नागरिकलाई जानकारी प्रवाह दिन यस्ता कार्यक्रमले महत्वपूर्ण भूमिका निर्वाह गर्ने बताए ।
यस्तै ट्राफिक व्यवस्थापनका लागि केवल ट्राफिक प्रहरी र नेपाल प्रहरीले मात्रै सम्भव नहुने भएकाले सबैको सहयोग र समन्वय जरुरी रहेको बताए । उनले चालक पेशालाई सम्मानित र जिम्मेवार बनाउन आवश्यक रहेको पनि बताए । चालकहरुले गर्ने व्यवहारलाई यात्रुमैत्री बनाउन सकियो भने आर्थिक हिसावले पनि यो सम्मानित पेशा हुने पनि उनको भनाइ छ । उनले कार्यक्रममा सहभागि चालकहरुलाई १२ बुँदे प्रतिज्ञा गराए ।
म तिव्र गतिमा कहिल्यै सवारी हाँक्दिन, मादक पदार्थ सेवन गरेर म कहिल्यै पनि सवारी साधन चलाउँदिन, सवारी चालक अनुमतिपत्र नभएको व्यक्तिलाई म सवारी चलाउन दिन्न, म ट्राफिक नियमको पूर्ण पालना गरेर मात्र सवारी चलाउँछु, निन्द्रा लागेको र थाकेको अवस्थामा म आराम नगरेसम्म सवारी चलाउँदिन, चालक पेशा मेरो परिवारको भविष्य हो, दुर्घटनाका कारण अन्धकार मा पर्न दिन्न लगायतका प्रतिज्ञा चालकहरुले गरेका थिए ।
त्यसैगरी सवारी चलाउनुअघि टायर, ब्रेक र सवारी साधन मुनि केही छ कि ? म अवश्य हेर्नेछु, मलाई फईदा हुन्छ भन्दैमा क्षमता भन्दा बढी वजन लिएर म कदापि सवारी चलाउँदिन, सवारीको नियमित मर्मत सम्भार गर्न म कहिल्यै ढिलासुस्ती गर्दिन, मलाई हतार छ भन्दैमा गलत साईड प्रयोग गरेर सवारी हॉक्दिन, म लेन अनुशासनको पूर्ण पालना गर्दछु, तोकिएको भन्दा बढी गतिमा सवारी चलाउँदिन र पैदलयात्री, अपाङ्ग, वृद्ध, महिला, बालबालिकाको इज्जत गर्नु मेरो कर्तव्य हो भनेर चालकहरुले प्रतिज्ञा गरेका थिए ।
Discussion about this post