काठमाडौं माघ ४ गते ।
कुनै अपराधमा संलग्नलाई लाग्न सक्छ( देशै छोडेर गएपछि सजायबाट जोगिन सकिन्छ । तर, अपराधका आरोपीको भ्रम त्यति बेला टुट्छ जब उ जुन देशको पुगेको हो, त्यहीँबाट पक्राउ पर्छ । विश्व प्रहरी संगठन इन्टरपोलले कुनै पनि कुनामा रहेकालाई पनि पक्राउ गरेर सम्बन्धित देश पठाउने गरेको छ ।
जबरजस्ती करणीका आरोपी खोटाङका किरण राई कतार पुगेका थिए । प्रहरीले खोजी गरिरहेकै बेला वैदेशिक रोजगारका लागि कतार पुगे पनि उनी जोगिन कहाँ सक्थे र रु प्रहरी प्रधान कार्यालयले राईविरुद्ध इन्टरपोलमार्फत पुस २० गते रेड नोटिस जारी गरेको थियो । रेड नोटिस जारी भएको पाँच दिनभित्रै कतारले राईलाई पक्राउ गरेर नेपाल फर्काइदियो । ठगी मुद्दा लागेपछि सफलराज कुँवर फरार थिए । सिंगापुर हुँदै मकाउ पुगेका कुँवरविरुद्ध पनि प्रहरीले इन्टरपोलकै साथ लियो र मकाउले पक्राउ गरेर पुस २१ नेपाल प्रहरीको जिम्मा लगायो ।
जबरजस्ती करणीका आरोपी उमेश लामा पनि इन्टरपोलको नजरलाई छल्न सकेनन् कुवेतले मङ्सिर ४ गते पक्राउ परेर नेपाल फर्काइदियो । जबरजस्ती करणीकै आरोपी यमबहादुर बुढाथोकी र साइबर अपराधका आरोपी सगिर अहमदलाई पनि इन्टरपोलले दुबईबाट पक्राउ गरेर नेपाल प्रहरीको जिम्मा लगायो । पछिल्लो पाँच वर्षमा नेपालमा अपराध गरेर विदेश पुगेकाविरुद्ध रेड नोटिस जारी भएपछि जुन देशमा पुगेको भए पनि पक्राउ पर्दै आएका छन् ।
नेपालमा अपराधको अभियोग लागेर विदेश पुगेकाविरुद्ध मुद्दा दायर भएपछि रेड नोटिस जारी हुन्छ । २०७६ सालदेखि हालसम्म फरार भएका २९ जना विदेशबाटै पक्राउ गरेर ल्याइएको छ । ती मध्ये अधिकांश हत्या, जबरजस्ती करणी र ठगी मुद्दाका आरोपी छन् । साइबर अपराधमा संलग्न पनि इन्टरपोलको निगरानीमा पर्छन् । दुबई, कतार, साउदीले सबैभन्दा धेरै आरोपी पक्राउ गरेर नेपालको जिम्मा लगाएको छ । मकाउ, कुवेत र पोर्चुगलले पनि नेपालमा अपराध गरेको आरोपीलाई नियन्त्रणमा लिएको छ ।
Discussion about this post