बाँके चैत ४ गते ।
बाँकेका किशोरीहरुलाई रक्तअल्पताको समस्याले गाज्दै लगेको पाइएको छ । सन्तुलित खानपानको अभावका कारण किशोरीहरुलाई रक्तअल्पताको समस्याले गाज्दै लगेको स्वास्थ्यकर्मीहरु बताउँछन् । स्वास्थ्य कार्यालय बाँकेका अनुसार दुई हजार आठ सय ४४ जना किशोरीमा गरिएको परीक्षणमा चार सय ३३ जनामा रक्तअल्पताको समस्या देखिएको छ ।
तीमध्ये पनि सात जनामा कडा खाले रक्तअल्पता देखिएको स्वास्थ्य कार्यालय बाँकेका फोकलपर्सन देवराज उपाध्यायले बताए । सामुदायिक विद्यालयका किशोरीहरुको रक्तअल्पता परीक्षण तथा व्यवस्थापन कार्यक्रम अन्तर्गत जिल्लाका आठ वटा पालिकाका १८ वटा विद्यालयमा ती किशोरीहरुको रक्त परीक्षण गर्दा १५ प्रतिशत किशोरीमा रक्तअल्पता देखिएको उपाध्यायले बताए । सबैभन्दा धेरै राप्ती सोनारीमा रक्तअल्पताको समस्या देखिएको छ ।
सिद्देश्वर माध्यामिक विद्यालयमा ३५ प्रतिशत किशोरीमा रक्तअल्पताको समस्या देखिएको छ । दुई सय ६० किशोरीको नमुना जाँच गर्दा ९१ जनामा रक्तअल्पता कम देखिएको हो । त्यसैगरी लक्ष्मी माध्यामिक विद्यालय मदुईमा १२ प्रतिशत किशोरीमा रक्त अल्पता देखिएको छ ।
दुई सय ११ जनाको जाँच गर्दा २६ जनामा रक्तअल्पताको समस्या देखिएको हो । जानकी गाउँपालिकामा रहेको जानकी माविमा ५० जना किशोरीमा गरिएको जाँचमा १० जनालाई रक्तअल्पता देखिएको छ ।
यो २० प्रतिशत हो । सुर्योदय मावि चिसापानी बैजनाथमा २६ प्रतिशत किशोरीमा रक्तअल्पताको समस्या देखिएको छ । एक सय ३८ किशोरीको नमुना जाँच गरिएकोमा ३७ जनामा रक्तअल्पता देखिएको हो ।
Discussion about this post