बाँके चैत ५ गते ।
नेपालगन्जस्थित वाटरपार्कमा भोलीदेखि सातौँ प्रादेशिक औद्योगिक लघु, घरेलु तथा कृषि, व्यापार एवम् पर्यटन महोत्सव हुने भएको छ । महोत्सवको तयारी अन्तिम चरणमा पुगेको आयोजक नेपाल घरेलु तथा साना उद्योग महासंघ बाँकेले जनाएको छ ।
घरेलु तथा साना उद्योगले उत्पादन गरेका बस्तुको बजारिकण गरि आर्थिक गतिविधिलाई चलायमान गराउने उद्देश्यले महोत्सव आयोजना गरिएको अध्यक्ष मधुकुमारी खड्काले बताइन् । महोत्सवको तयारीका बारेमा जानकारी दिन सोमवार गरिएको पत्रकार सम्मेलनमा उनले तयारी अन्तिम चरणमा रहेको बताइन् । उनले भनिन्, ‘महोत्सवको सम्पूर्ण तयारी पुरा भएको छ । महोत्सवमा आउने कलाकारको टुंगो लागिसकेको छ ।’
महोत्सवमा दुई सय स्टल राखिएको छ । यी सवै स्टल बुक भइसकेको उनले बताइन् । सुस्ताउँदै गएको ब्यापार, व्यवसायलाई चलयमान बनाउने उद्देश्यका साथ उद्यमीले उत्पादन गरेका वस्तुको बजारिकरण, प्रवद्र्धन र उद्यमीलाई प्रोत्साहन गर्न महोत्सवको आयोजना गरिएको अध्यक्ष खड्काले बताइन् ।
महोत्सवबाट संकलन भएको रकमबाट घरेलु महासंघको भवन निर्माणमा खर्च गरिने उनले बताइन् । ‘नेपालगन्जको मौलिक खानाको प्रबद्र्धन र वाटरपार्कको प्रचार प्रसार गरि आन्तरिक पर्यटन प्रवद्र्धन गर्ने महोत्सवको उद्देश्य हो,’ उनले भनिन् ।
गर्मीलाई मध्यनजर गरि बेलुका ८ बजेसम्म महोत्सव सञ्चालन हुने भएको छ । बेलुकासम्म महोत्सव लगाउने कार्य पहिलो भएको बताउँदै उनले सन्ध्याकालिन महोत्सवको आनन्द लिन आग्रह गरिन् ।
वाटरपार्कस्थित मैदानमा हुने महोत्सव १३ दिनसम्म चल्ने भएको छ । महोत्सवमा ५० वटा स्टल उद्यमीलाई निशुल्क उपलब्ध गराइएको आयोजकले जनाएको छ । स्टलमा कृषि, वन पैदावार, हस्तकला, ऊर्जा, बायोग्यास लगायतका सामग्रीहरू प्रदर्शनीका लागि राखिने भएको छ ।
महोत्सवमा हरेक दिन स्थानीय तथा राष्ट्रिय कलाकारले अभिनय गर्ने भएका छन् । चैत १२ गते होलीका दिन कलाकार पल शाह आउने आयोजकले जनाएको छ । महोत्सवमा कम्तिमा दुई लाख जनाले अवलोकन गर्ने लक्ष्य रहेको नेपाल घरेलु तथा साना उद्योग महासंघ बाँकेका महासचिव जिआर भुसालले बताए । ‘महोत्सव अवधिभर दुई करोड रुपैयाँको कारोबार हुने अपेक्षा लिएका छौँ,’ उनले भने ।
महोत्सवको उद्घाटन लुम्विनी प्रदेशका निवर्तमान मन्त्री कृष्णा केसी (नमुना) ले गर्ने भएकी छन् । उत्घाटन अघि नेपालगन्जका सेतु विक चोकबाट झाँकीसहितको र्याली हुने महासचिव भुसालले जानकारी दिए ।
Discussion about this post