बाँके चैत १५ गते ।
बाँकेमा यसवर्षको एसईई आजदेखि सुरु भएको छ । विहान ८ बजेदेखि ११ बजेसम्म चल्ने पहिलो दिन विद्यार्थीहरुले अँग्रेजी विषयको परीक्षा दिइरहेका छन् । यो वर्ष बाँकेमा ९ हजार २ सय ९३ जना परीक्षार्थीले माध्यमिक शिक्षा परीक्षा (एसईई) दिँदैछन् ।
शिक्षा समन्वय इकाई कार्यालयका अनुसार आजदेखि सञ्चालन भएकोे एसईईमा ४ हजार ७ सय ६३ छात्र र ४ हजार ५ सय ३० जना छात्रा सहभागी भएका छन् । बाँकेमा ३४ वटा परीक्षा केन्द्र तोकिएका छन् । २८ सामुदायिक विद्यालयबाट ६ हजार ४ सय ४० र ६ संस्थागत विद्यालयबाट २ हजार ८ सय ५३ विद्यार्थी सहभागी हुने कार्यालय प्रमुख रामसुरेश यादवले बताए ।
उनका अनुसार १० जना अपांगता भएका बालबालिकाहरु पनि परीक्षा दिन लागेका छन् । त्यसैगरी बैजनाथ गाउँपालिकामा रहेको नौवस्ता कारागारबाट १२ र डुडुवा गाउँपालिका ६ मा रहेको जयन्दु बालसुधारबाट ३३ गरी ४५ जना बालबालिका पनि परीक्षामा सहभागी हुन लागेका छन् ।
नेपालगन्ज उपमहानगरपालिकामा ९ वटा, कोहलपुर नगरपालिकामा १०, बैजनाथ, राप्तीसोनारी र खजुरा गाउँपालिकामा ४÷४ डुडुवा, नरैनापुर र जानकी गाउँपालिकामा १÷१ वटा केन्द्र रहेको शिक्षा समन्वय इकाई बाँकेले जनाएको छ । राप्ती सोनारीका गणेश मावि ढकेरी, शिवशक्ती मावि पेरानी, भुवन भवानी मावि विनौना र सिद्देश्वर मावि सिधनियामा केन्द्र तोकिएको छ ।
जुन विद्यालयमा केन्द्र तोकिएको छ त्यही विद्यालयको प्रअलाई केन्दाध्यक्ष बनाइएको पनि यादवले बताए । उनले कुन पालिकामा कति विद्यार्थी सहभागी छन् भन्ने बारे भने कार्यालयले तथ्यांक ननिकालेको बताए ।
Discussion about this post