बाँके जेठ ३२ गते ।
नेपाल–भारत सीमा क्षेत्रको जमुनाहस्थित रहेको सुख्खा बन्दरगाहमा सुरक्षा चेकजाँचको अभाव देखिएको छ । बन्दरगाह निर्माणपछि त्यहि बाटो भएर ठुला सवारी साधन नेपालगञ्ज आउने र भारततिर जाने गरिरहेका छन् । तर, ती साधनको चेकजाँचका लागि सरकारी तवरबाट कुनै प्रयास गरेको देखिँदैन । भारतर्फ भने भारतीय सुरक्षाकर्मीले चेकजाँच गर्ने गरेका छन् । यता नेपालमा भने सुरक्षाका लागि नत नेपाल प्रहरी छन, नत सशस्त्र नै ।
बन्दरगाहकै सेक्युरिटी गार्ड र जमुनाहबाट दैनिक पठाइने एक जना सशस्त्रका जवानले दैनिक सयौं यस्ता साधनको निगरानी गर्न कठिन देखिएको छ । यद्दपी नेपाल प्रहरीले भने अहिलेसम्म बन्दरगाहमा सुरक्षा चेकजाँचका लागि एउटा युनिट समेत राख्न चासो देखिाएको छैन ।
यसले यसरी भारत जाने र नेपाल आउने यात्रुबहाक बससँगै कन्टेनरमा र ट्रकमा अबैधरुपमा विभिन्न सामानहरु ओसारपोसार भइरहेको स्थानीय बताउँछन् । जसका कारण नेपाल तर्फको भन्सारमा राजश्व छली भइरहेको छ । बसका सिटमुनी र डिकीमा र ट्रकको भित्रि भागमा यसरी अबैद्य रुपमा सामान नेपालगञ्जतिर आर्यात भइरहेका छन् भने भारततर्फ यहाँको जडिबुटी लगायतका विविध सामान निर्यात भइरहेको गुनासो आएको छ । यसको रोकथाम र नियन्त्रणका लागि पनि सुख्खा बन्दरगाहको नेपालतर्फ सुरक्षा चेकजाँच कडा पार्नुपर्ने देखिएको छ ।
यस बन्दरगाहबाट दैनिक तीनचार समयको हाराहारीमा ठुला कन्टेनरमा, मालवहाक ट्रक र यात्रुबहाक साधान भारततर्फ जाने र नेपालगञ्जतिर आउने गरेका छन । नेपाल अर्थात नेपालगञ्ज रुट भएर भारतको लखनउ, सिमला, दिल्ली लगायतका शहरमा दैनिक यात्रुबहाक बस सञ्चालनमा आएका छन । यात्रु ओसार्ने निहुँमा अधिकाशं बस, हाइस र साना सवारी बोक्ने गाडी तथा माल बोक्ने ट्रकमा नियमित चेकजाँच हुन सकेको देखिँदैन ।
बन्दरगाहमा प्रहरी चेकपोष्ट राख्ने वा दैनिक विहान ५ देखि बेलुका १० बजेसम्म प्रहरी चेकजाँचमा खटाउने बारे बाँके सिडिओ र एसपी उदासीन देखिएका छन् । तर, यहाँका नागरिक यस्ता अबैद्य सामान रोकथाम र नियन्त्रणका लागि बन्दरगाहमा प्रहरी चेकजाँच राख्नुपर्ने बताउँछन् ।
एक बर्षअघि नेपालका प्रधानमन्त्री पुष्पकमल दाहल र भारतीय प्रधानमन्त्री नरेन्द्र मोदीले संयुक्तरुपमा उदघाटन गरेका थिए । यसै दिनदेखि यहाँबाट सवारी आवतजावत भएपनि सुरक्षा चेकजाँचको गतिलो अहिलेसम्म पनि व्यवस्था भने हुन सकेको छैन ।
Discussion about this post