बाँके असार १४ गते ।
कृषि पेसा गरेर मासिक ठुलो रकम आम्दानी गर्न सकिन्छ, पैसा कमाउन विदेशै जानु पर्दैन भन्ने उदाहरण प्रस्तुत गर्न सफल हुनु भएको छ बाँके कोहलपुर नगरपालिका–६ का निवर्तमान वडा अध्यक्ष रामशरण थारु । उनले कोहलपुर ६ मा कृषि पेसा गरेर मासिक डेढ लाख रुपियाँ कमाउँछन् ।
थारुले व्यावसायिक भैंसीपालन, माछा, कुखुरा र बङ्गुरपालनका साथै मकै, प्याज र करेलाको खेती समेत गरेर मासिक डेढ लाख बढी आम्दानी गरिरहनु भएको छ । आफ्नै देशमा केही गर्ने चाहना हुनेलाई पैसाको कुनै कमी नहुने र विदेशमा गएर हण्डर समेत खानु नपर्ने थारुले बताए । उनले स्वदेशकै माटोमा अलि मन लगाएर मिहिनेत गरी काम गर्ने हो भने प्रशस्तै पैसा कमाउन सकिने बताए ।
राजनीतिसँगै कृषि पेसामा लाग्नु भएका थारुको अधिकांश समय भैँसीको स्याहारसुसार र हेरचाहमा बित्ने गरेको छ । उनले पशुतर्फ व्यावसायिक भैँसीपालन गरेका छन् भने सोही फार्ममा माछा, कुखुरा र बङ्गुरपालन पनि गरेका छन् । सोही प्रकारले मकै, प्याज र करेलाको खेती पनि उनले गरेका छन् । बिहान, बेलुका गोबर सोहोर्नेदेखि घाँस काट्ने र दूध दुहुनुमा नै उहाँको समय बित्ने गरेको छ । उनको कृषि फार्ममा हाल साना ठुला गरी ८ वटा भैँसी, माछा, कुखुरा र बङ्गुर रहेका छन् ।
करिब २ बिघा ८ कठ्ठा जमिन भाडामा लिएर गरिएको तरकारी खेती, भैँसी, बङ्गुर, कुखुरा र माछा पालनबाट सोचेभन्दा राम्रै आम्दानी भइरहेको छ । थारुका अनुसार मासिक करिब ८०० देखि एक हजार लिटर दूध बिक्री गरी एक लाख रुपियाँसम्म आम्दानी हुने गरेको छ । त्यो सँगै कुखुरा, माछा, बङ्गुरबाट गरेर मासिक डेढ लाख जति आम्दानी भइरहेको उनको भनाइ छ ।
नेपालमा राजनीति गर्ने र राजनीति गरेका मान्छेले सानातिना काम गर्न हुँदैन भन्ने गलत भाष्य निर्माण हुँदै गएका बेला अरूले पनि थारुबाट केही सिक्नु पर्ने देखिन्छ । २०७६ साल मङ्सिर १४ गते भएको उपनिर्वाचनबाट कोहलपुर –६ को वडाध्यक्षमा निर्वाचित हुनु भएका थारुले त्योभन्दा पहिला र अहिले वडा अध्यक्ष नहुँदा पनि कृषि व्यवसाय गर्दै आएका छन् ।
उनले कृषि पेसालाई निरन्तरता दिने जनाउँदै अन्य युवालाई पनि यो पेसा अँगाल्न आग्रह गरेका थिए । राजनीति पेसा नभएर सेवा भएकाले सो सँगै आर्थिक जीवनस्तर उकास्न र अरूका लागि समेत उदाहरणीय बन्नका लागि आफू व्यावसायिक कृषि तथा पशुपालनमा लागेको उनको भनाइ छ ।
Discussion about this post