बाँके असार २४ गते ।
बाँकेका लक्षित तथा लोपोन्मुख अति पिछडिएका विभिन्न जातजातिका समुदायलाई आर्थिक समृद्धिका लागि आय आर्जन गर्ने उद्देश्यले बाख्रा वितरण गरिएको छ । भेटेरिनरी अस्पताल तथा पशुसेवा विज्ञ केन्द्र बाँकेद्वारा आयोजना गरिएको एक कार्यक्रमका बीच अति पिछडिएका नेपालगन्ज उपमहानगरपालिका र डुडुवा गाउँपालिकाका सय परिवारलाई ३ सय बाख्रा वितरण गरिएको हो ।
लुम्बिनी प्रदेश सरकारका कृषि मन्त्री भण्डारीलाल यादवले लक्षित तथा लोपोन्मुख जातिका रुपमा रहेका किंगरिया, कुछबधिया, मुसहर, नटवा र पासी जातिका विपन्न र पिछडिएका परिवारलाई प्रति परिवार तीन वटा बाख्रा गरेर सय परिवारलाई बाख्रा वितरण गरे । सो अवसरमा बोल्दै मन्त्री यादवले सरकारले प्रदेशमा रहेका लोपोन्मुख तथा अति विपन्न समुदायलाई माथि उकास्न उनीहरुको आय आर्जन वृद्धि गरेर आर्थिक रुपमा उनीहरुलाई सबल बनाउन यी बाख्रा वितरण गरिएको बताए ।
उनले बाख्रा पालन गरेर यसै माध्यमबाट बाख्राको संख्या बढाउँदै आयमा समेत वृद्धि गरेर अगाडी बढ्न लोपोन्मुख जातिका सर्वसाधारणलाई आग्रह गरे । आय आर्जनका लागि नेपालगन्ज उपमहानगरपालिका–२० र २२ तथा डुडुवा गाउँपालिका–३, ५ र ६ मा हरेक वडाबाट २० परिवारको छनोट गरेर लक्षित समुदायका सय परिवारलाई ३ सय वटा बाख्रा बितरण गरिएको भेटेरिनरी अस्पताल तथा पशुसेवा विज्ञ केन्द्र बाँकेका प्रमुख कमला अधिकारीले बताए ।
आय आर्जनका लागि बाख्रा पालन गर्ने उद्देश्यले बाख्रा लिन आएका अधिकांश अति पिछडिएका समुदायका नागरिकले मिहिनेतले बाख्रा पालन गरेर आयमा वृद्धि गर्ने प्रतिबद्धता जनाएको लुम्बिनी प्रदेशका कृषि मन्त्री यादवका स्वकीय सचिव राजेन्द्र विश्वकर्माले बताए ।
Discussion about this post