बाँके साउन १२ गते ।
घटनाः १
नेपालगन्जमा गएको असोज पहिलो साता दुई समुदाय बीच विवाद भयो । विवाद उत्कर्षमा पुग्दा प्रहरीले हवाई फायर गर्न पर्यो । स्थिति नियन्त्रण बाहिर गएपछि कर्फयु जारी गरि स्थितलाई शान्त बनाइयो । करिव एक सातासम्म नेपालगन्ज अशान्त रहन गयोे । यहि घटनालाई लिएर बाँकेका तत्कालिन प्रमुख जिल्ला अधिकारी विपिन आचार्य र बाँकेका तत्कालिन प्रहरी प्रमुख एसपी सन्तोषसिंह राठौर अवधि नपुग्दै राजधानी काठ्माडौँ तानिए ।
घटनाः २
नेपालगन्ज उपमहानगरपालिका–२१ विर्तामा चैत १८ गते स्थानीय २० वर्षीय युवक अरबी खाँको विभत्स तरिकाले हत्या भयो । खाँको घाँटीमा धारिलो हतियार प्रहार गरि हत्या भएको करिव ५ महिना पुग्नै लाग्दा पनि अहिलेसम्म हत्यारा पत्ता लाग्न सकेको छैन । घटना अनुसन्धानका लागि सिआइवीको टोली आए पनि अहिलेसम्म बाँके प्रहरी अनुसन्धानमै छ । यसका लागि वरिष्ठ प्रहरी हवल्दार अतिस खाँको नेतृत्वमा सादा पोशाकका प्रहरी परिचालन भएका छन् । तर, ति सादा पोशाकका प्रहरीले अहिलेसम्म हत्यारा नजिक पुग्न सकेका छैनन् ।
घटनाः ३
धारिलो हतियार प्रयोग गरेर असार २८ गते राती नेपालगन्जमा अर्का युवकको हत्या भयो । नेपालगन्ज उपमहानगरपालिका–११ त्रिभुवन चोक नजिकै ३८ वर्षीय इरसाद राईमाथि धारिलो हतियार प्रहार गरि हत्या गरिएको १५ दिन वितिसक्दा समेत प्रहरीले हत्यारा पत्ता लगाउन सकेको छैन ।
घटनाः ४
जानकी गाउँपालिका ३ …गाउँका एक युवकलाई लुटेराको समुहले घरमै आक्रमण गरि हत्या गरियो । घरमा लुटपाट गर्न गएका लुटेराको समुहले ति युवकलाई धारिलो हतियारले आक्रमण गरेका थिए । तर प्रहरीले लुटेराको समुहलाई अहिलेसम्म पक्राउ गर्न सकेको छैन ।
यी त केही प्रतिनिधिमुलक घटना मात्र हुन् । पछिल्लो समय बाँके सुरक्षाको दृष्टिकोणले अत्यन्तै असुरक्षित र जोखिम जिल्लाका रुपमा चिनिन थालेको छ । असोजमा भएको दुई समुदाय बीचको धार्मिक द्वन्द्वलाई नियन्त्रण गर्न असफल भएको भन्दै तत्कालिन प्रमुख जिल्ला अधिकारी आचार्य र एसपी राठौरलाई गृह प्रशासनले सरुवा गरे पनि जिल्ला प्रहरी कार्यालय बाँकेको दोस्रो जिम्मेवार तहमा रहेका प्रहरी प्रवक्ता डिएसपी नारायण डाँगीलाई भने गृह प्रशासनले चोखो बनायो । सिडिओ आचार्यको ठाउँमा श्रवणकुमार पोख्रेल आए भने एसपी राठौरको ठाउँमा सुभाषचन्द्र बोहरालाई पठाइयो ।
जिल्लाको शान्ति, सुरक्षाको अवस्था, जोखिम क्षेत्र र चुनौति बारे माथिल्लो तहलाई डिएसपी डाँगीले प्रभावकारी ढंगबाट जानकारी नगराउँदा बाँकेमा शान्ति, सुरक्षाको जोखिम दिनप्रति दिन बढ्दै गएको छ । डिएसपी डाँगीले माथिल्लो तहलाई शान्ति, सुरक्षाको अवस्था ठिक छ भनेर व्रिफिङ गर्ने गरेको एक अधिकारीले बताए । कतिपयले एसपी बोहरालाई असफल बनाउन पनि डाँगीकै भुमिका भएको दावी गर्छन् । बोहरा कार्यकाल पूरा नहुँदै तानिए थिए ।
प्रहरी परिचालनको मुख्य जिम्मेवारी पाएका डाँगीले प्रभावकारी भूमिका निर्वाह नगरेका कारण अहिलेसम्म विर्ता र त्रिभुवन चोक नजिकै भएको हत्या घटनाका अपराधीहरु पक्राउ पर्न सकेका छैनन् । डिएसपी डाँगीलाई दवाव र प्रभावमा पारेर विभिन्न पोष्टमा गएका इन्चार्जहरु अहिले कमाउ धन्दामा लागेका छन् । उनीहरुले डिएसपी डाँगीलाई लाइन दिएका छन् वा छैनन् त्यसको पुष्टि त भएको छैन, तर तस्करसँग सेटिङ गरेर पोष्ट इन्चार्जहरुले रकम असुली गरिरहेको अनलाइन खोजखवरले तथ्य फेला पारेको छ ।
यसअघि वडा प्रहरी कार्यालय बाँकेको इन्चार्जको भूमिका समेत निर्वाह गरिसकेका डिएसपी डाँगीले जिल्ला प्रहरी कार्यालय बाँकेमा डिएसपीको भूमिकामा रहेको करिव एक वर्ष पुग्नै लागेको छ । आफ्नो एक वर्षीय कार्यकाल पुरा हुन लाग्दा डिएसपी डाँगीले आफु अनुकूलका प्रहरी अधिकृतलाई पोष्ट इन्चार्जको जिम्मा दिएका छन् । यहाँसम्मकी काजमा आएकालाई पनि प्रहरी पोष्टको इन्चार्जको जिम्मेवारी उनकै जोड्बलमा दिइएको छ ।
जिल्ला प्रहरी कार्यालय बाँकेबाट खटिएको हवल्दार अतिस खानको कमाण्डमा खटिएका सादा पोशाकका पाँच जना प्रहरीलाई पनि डिएसपी डाँगीले नै परिचालन गरेको बुझिएको छ । उनले आफूलाई मन पर्ने जवान, हवल्दार र जुनियर अधिकृतलाई राम्रो कमाई हुने ठाउँमा पठाउँदै आएका छन् । बोलीमा मिठास भएका डाँगीको नियत भने शंकापद देखिएको सर्वसाधारण बताउँछन् ।
व्यक्तिगत स्वार्थपूर्तिका लागि काम गरेको छैनः डिएसपी डाँगी
https://www.onlinekhojkhabar.
Discussion about this post