बाँके साउन २७ गते ।
कोहलपुर–नेपालगन्ज सडक खण्डको राँझादेखी कोहलपुर सम्मको सडक मर्मत गरेको महिनादिन नपुग्दै मर्मत गरेकै ठाँउमा पुनः भत्किएको पाइएकोछ ।
सडक डिभिजन कार्यालय नेपालगन्जले ठेकेदार कम्पनी मार्फत गत आर्थिक वर्षमा ३ हजार ४ सय स्क्वायर फिट सडक मर्मत गरेको भएपनि मर्मत गरेको एक महिना नपुग्दै मर्मत गरेकै स्थानमा पुनः भत्किएको हो राँझा–कोहलपुर सडक खण्डको एक दर्जन बढि स्थानमा सडक भत्किएर खाल्टो पर्नुका साथै पानी जम्ने अवस्था सृजना भएको छ । फोरलेन सडकमा तीब्र गतिमा सवारी साधन गुड्ने र सोही खाल्टोका कारण सडक दुर्घटना बढेको ट्राफिक प्रहरीको भनाई छ ।
वर्सेनि सडक मर्मत गदै आएको सडक डिभिजनले २०८० असोज १५ गते ३ महिना भित्र काम सक्ने गरि शुभ आर्य बिल्डर्स राप्तीसोनारी लाई ३ हजार ४ सय स्क्वायर मिटर मर्मतको जिम्मा दिएको सडक डिभिजन कार्यालय नेपालगन्जका इन्जिनियर तेजेन्द्र खड्काले बताए । कोटेसन मार्फत सो निर्माण कम्पनीलाई कामको जिम्मेवारी दिइएको डिभिजन कार्यालय श्रोतले जानकारी दिएको छ । ३ महिनामा मर्मत सक्ने गरि सम्झौता भएको भएपनि असार मसान्तमा मात्रै काम सम्पन गरेको भन्दै ३५ लाख रुपैयाँ भुक्तानी दिइएको थियो । तर, काम सकेको एक महिना नपुग्दै सडक पहिले भन्दा खराब बनेको स्थानीयले बताएका छन् ।
कोहलपुर नगरपालिका–१० का नन्दलाल पौडेलले असार मसान्तमा हतार–हतार सडक खनेर मर्मत गरेको ठेकेदार कम्पनीले गुणस्तरहीन काम गरेकाले एक महिना नपुग्दै पुन भत्किएको बताउँछन् । हाल उक्त स्थान पहिले भन्दा झन् खराब बनेको उनको भनाइछ । उनले सडक डिभिजनको मिलेमतोमा कोटेशनमा काम दिने र गुणस्तरहीन काम हुने गरेको आरोप लगाए । स्थानीय पौडेलले मर्मत गर्ने भन्दै खनिएको सडकको उचित मर्मत नहुदाँ दुर्घटनाको समेत जोखिम बढेको बताए ।
फोरलेन सडकमा तीब्र गतिमा सवारीसाधन गुड्ने र बिच सडकमा पानी जम्ने खाल्टोमा एक्कासी सवारीसाधन गुड्दा दुर्घटनाको जोखिम बढेको उनले बताए । यस्तै सोही खण्डमा मर्मतको जिम्मा लिएको अर्को निर्माण कम्पनी यु एसआई डोल्पाले काम नगेरको भन्दै कालो सूचीमा राख्ने प्रक्रिया अगाडि बढाइएको सडक डिभिजन श्रोतले जनाएको छ ।
Discussion about this post