कैलाली भदौ २९ गते ।
कैलालीमा बाढीको जोखिममा परेका ६३६ जनालाई सुरक्षित स्थानमा सारिएको छ । अविरल वर्षाका कारण बिहीबारदेखि नदीमा बाढी गएपछि जोखिममा रहेका १६२ घरका ६३६ जनालाई आज सुरक्षित स्थानमा सारिएको जिल्ला प्रशासन कार्यालयका सूचना अधिकारी शिवराज जोशीले जानकारी दिए ।
कैलालीका पथरिया, कटैनी, काँडा लगायतका नदीमा गएको बाढीका कारण जानकी गाउँपालिका–४, सुकम्वासी टोल, कैलारी गाउँपालिका–७, वसन्ता, जोशीपुर गाउँपालिका–३, भितरीया, कैलारी–५, मनिकपुर, भजनी नगरपालिका–८ र ३ अन्तर्गतका स्थान डुबानमा परेको उनले बताए ।
सूचना अधिकारी जोशीकानुसार ३४ जनालाई जानकी गाउँपालिका–४ का ९४ जनालाई जानकी गाउँपालिका–७, फरेला, ४०० जनालाई टिकापुर नगरपालिका–८, वनगाउँस्थित सुरक्षित स्थानमा सारिएको छ । यस्तै, ११ जनालाई जोशीपुर गाउँपालिका–३, भितरियास्थित जनहित सामुदायिक वनको भवन, ७७ जनालाई भजनी नगरपालिका–९, कुणी खुरखरियास्थित गुप्तेश्वर आधारभुत विद्यालयमा सारिएको पनि जोशीले जानकारी दिए ।
आठजनालाई कैलारी गाउँपालिका–५ स्थित सुरक्षित घरमा, चारजनालाई गोदावरी नगरपालिका–११ स्थित लालमणी पनेरु, आठजनालाई सोही स्थानका राधिका ढोली र मधुरा दमाईको घरमा सारिएको छ ।
जिल्लामा ६०० परिवारका दुई हजार ७८२ व्यक्ति बाढीबाट प्रभावित भएका छन् । अविरल वर्षापछिको बाढीबाट दुईजना घाइते भएका छन् । बाढीले ६ कच्ची घर र पाँच बिघा जमिन कटान गरी क्षति पु¥याएको सूचना अधिकारी जोशीको बताए ।
Discussion about this post