बाँके, भदौ १६ गते ।
बाँकेको नौबस्ता कारागारमा रहेका ४६६ कैदीबन्दीले रसुवा र नुवाकोटका बाढीपीडितका लागि ४९ हजार ५१० रुपैयाँ सहयोग गरेका छन् । उनीहरूले आफ्नो व्यक्तिगत खर्चबाट रकम छुट्याएर प्रधानमन्त्री दैवीप्रकोप उद्धार कोषमा जम्मा गरेका हुन् ।
कारागारको ‘बी’ ब्लकमा रहेका कैदीबन्दीले स्वैच्छिक रूपमा रकम संकलन गरेका थिए । विपत्का बेला पीडित परिवारलाई सहयोग गर्ने उद्देश्यले उनीहरूले व्यक्तिगत रूपमा प्राप्त हुने खर्चबाट रकम छुट्याएको कारागार प्रशासनले जनाएको छ ।
नौबस्ता कारागारका निमित्त प्रमुख ज्ञानबहादुर ओलीका अनुसार भोटेकोशी नदीमा आएको बाढीबाट भएको मानवीय तथा भौतिक क्षतिप्रति दुःख व्यक्त गर्दै कैदीबन्दीले सहयोग संकलन गरेका हुन् ।
रकम संकलन गर्नुअघि उनीहरूले बाढीमा परी ज्यान गुमाएकाप्रति सामूहिक श्रद्धाञ्जली अर्पण गरेका थिए । शोकसन्तप्त परिवारप्रति समवेदना व्यक्त गर्दै उनीहरूले विपत्मा परेका नागरिकलाई आफ्नो तर्फबाट सहयोग गर्ने निर्णय गरेका थिए । “बन्दीले स्वैच्छिक रूपमा गरेको यो सहयोग मानवीय संवेदनाको उदाहरण हो,” ओलीले भने ।
कारागारमा रहेका कैदीबन्दीले आफ्नै व्यक्तिगत खर्चबाट रकम जुटाएर विपत्का पीडितलाई सहयोग गरेको यो पहललाई कारागार प्रशासनले सकारात्मक रूपमा लिएको छ ।
Discussion about this post