बाँके असोज १४ गते ।
छाडा पशचौपायाँका कारण बाँकेमा सवारी दुर्घटना बढ्न थालेपछि प्रहरीले त्यसको न्यूनीकरणका विभिन्न कार्यक्रमलाई गर्दै आएको छ । विशेषगरी छाडा पशुचौपायाँका कारण रातको समयमा सवारी दुर्घटना बढी हुने गरेका छन् ।
रातको समयमा हुने दुर्घटना न्यूनीकरणका लागि नेपालगन्जका विभिन्न स्थानमा प्रहरीले छाडा चौपायाँको घाँटीमा टल्किने खालको रिफ्लेक्टर स्टिकर लगाइदिने अभियानलाई तीब्रता दिएको छ ।
आज नेपालगन्जको बसपार्क क्षेत्रमा भेटिएका करिव २० वटा छाडा पशुचौपायाँको घाँटीमा रिफ्लेक्टर स्टिकर टाँसिएको छ । जसका कारण रातीको समयमा टल्किन्छ । र, सवारी दुर्घटना न्यूनीकरणमा टेवा पुग्ने वडा प्रहरी कार्यालय नेपालगन्जका प्रमुख प्रहरी निरीक्षक अरुण बमले जानकारी दिए । उनका अनुसार नगरक्षेत्रमा छाडा पशुचौपायाँ सवारी दुर्घटना मध्येको एउटा कारण रहेको छ । प्रहरी निरीक्षक बमको नेतृत्वमा अस्थायी प्रहरी पोष्ट बसपार्क र अस्थायी ट्राफिक प्रहरी पोष्ट बसपार्कको टोलि खटिएको थियो ।
यसअघि नेपालगन्ज उपमहानगरपालिका–६ फुलटेक्राको सडक क्षेत्रमा भेटिएका छाडा चौपायाँलाई पनि प्रहरीले रिफ्लेक्टर स्टिकर लगाइ दिएको थियो । नेपालगन्ज उपमहानगरपालिकाले छाडा पशुचौपायाँलाई कान्जी हाउसमा राख्ने गरेको छ ।
तर प्रभावकारी हुन सकेको छैन । नेपालगन्जमा छाडा पशुचौपायाँ व्यवस्थापन स्थानीय सरकार, प्रहरी प्रशासनका लागि चुनौतिपूर्ण बनेको छ । छाडा पशुचौपायाँले सवारी दुर्घटनाका घटना त भइरहेकै छन् नगरलाई समेत क्रुप बनाएको छ ।
Discussion about this post