बाँके कात्तिक ११ गते ।
बाँके जिल्लाको कोहलपुर–१३, भरैयामा किसानहरूले लगाएको धानबारीमा कालो पोके किराको प्रकोप देखा परेको छ । यो समस्या विशेषतः सावा मन्सुली प्रजातिको धानमा देखिएको हो ।
जसले गर्दा किसानले कटान गर्न तयारी अवस्थामा रहेको धानमा ठूलो क्षति बेहोर्नुपरेको छ । कोहलपुरको धान उत्पादन हुने क्षेत्रमा लगाइएको धानमा कालो पोके किराको व्यापक प्रकोप फैलिएको र उत्पादनमा ठूलो असर परेको कोहलपुर कृषि विकास शाखाका अधिकृत चन्द्र बुढाले जानकारी दिए ।
कृषक कमल वलीले लगाएको चार कठ्ठा क्षेत्रफल लगायत अन्य किसानहरू यो समस्याबाट प्रभावित छन्। वलीले रोपेको धानमा कालो पोके किराले धानको बोटमा गम्भीर क्षति पु¥याएको र हर वर्ष उस्तै समस्या दोहोरिने गरेको कृषकहरूको गुनासो रहेको छ । विशेषज्ञका अनुसार, कालो पोके किराले धानको बोटलाई आक्रमण गरी भित्रभित्रै नष्ट पार्ने गर्छ ।
यो किराले धानको बोक्रामा कालो धब्बा बनाउँदै बोटको पोषण तन्तुलाई नष्ट गरिदिन्छ । जसले गर्दा बोट कमजोर भई बालीमा बालाको विकास हुन सक्दैन। किसानहरूले गुनासो गरे जस्तै, यो किरा हरेक वर्ष धान कटानको समयमा फेरि फर्कने भएकाले ठोस समाधान आवश्यक भएको बताइएको छ ।
यस समस्याको समाधानका लागि कृषि विकास शाखाका अधिकृत बुढाले उपचार गरिएका बीउ प्रयोग गर्ने, जैविक कीटनाशक र उचित मलको प्रयोग गर्न सुझाव दिए । कोहलपुर कृषि विकास शाखाले कृषकहरूलाई सधैँ रोगविरुद्ध प्रतिरोधात्मक उपायहरू अपनाउन, बीउ छानबिन गरी उपयोग गर्न र खेतमा नियमित अवलोकन गर्न सल्लाह दिएको छ ।
Discussion about this post