बाँके कात्तिक १४ गते ।
बाँकेमा हिंजोआज दैनिक जस्तो जुवाडेहरु प्रक्राउ परिरहेका छन् । अहिलेसम्म प्रहरीले जयसपुर, राप्तीसोनारी, वसपार्क लगायतका क्षेत्रबाट लाखौं रुपैयाँसहित जुवाडेहरु पक्राउ गरिसकेको छ ।
बाँकेका प्रहरी प्रमुख एसपी तुल बहादुर कार्कीको निर्देशनमा जिल्लामा जुवातास विरुद्ध प्रहरी आक्रामक रुपमा उत्रिएको छ । कानुन वर्जित जुवातास नियन्त्रणमा एसपीको ठाडो निर्देशन भएपछि मातहत पनि तातिएका छन् । तर घुमुवा प्रहरीलाई भने मोटो रकम असुली गर्ने ठूलो मौका मिलेको छ । एसपी कार्कीलाई गुम्राहमा राखेर घुमुवाहरुले जुवाखालबाट बरामद गरेको रकम नै गायव पार्ने गरेका छन् । गएको कार्तिक ५ गते राती राप्तीसोनारी(६ स्थित संजय रानाको घरबाट ३ लाख ९१ हजार रुपैयाँ सहित २० जना जुवाडे पक्राउ परे । उक्त जुवाखालमा घुमुवाका इन्चार्ज प्रहरी हवल्दार आतिस खानको नेतृत्वमा टोलि पनि पुगेको थियो । एसपीलाई गोप्य सूचना प्राप्त हुना साथ उनले वडा प्रहरीबाट दुई जना प्रहरीलाई गाडीसहित राप्तीसोनारी पठाएका थिए । प्रहरीले सफलता पनि हात पार्यो ।
त्यहाँ २० जना जुवाडेसहित करिव १० लाख रुपैयाँ खालबाटै प्रहरीले फेला पारेको थियो । तर घुमुवा प्रहरीले ६ लाखबढी रुपैयाँ गायव पारे । उनीहरुले केवल ३ लाख ९१ हजार रुपैयाँ मात्रै बरामद गरेको एसपी कार्कीलाई जाहेर गरे । बाँकी आफैले राखे । बरामद गरिएको ६ लाख बढी रकममध्ये आधा रकम जुवाडेलाई नै फिर्ता गर्ने सहमति घुमुवा इन्जार्च खानले गरेका थिए ।
कुरा बाहिरिन थालेपछि खानले सुटुक्क जुवाडेलाई रकम फिर्ता गरे । तर खानसहित पुगेका घुमुवाका प्रहरी जवान वीरबहादुर ताउलेले भागबन्डामा परेको रकम फिर्ता नगरेपछि कुरा बाहिरियो । उनले ४० हजार रुपैयाँ जुवाडेलाई फिर्ता गर्नुपर्ने थियो । रकम माग्दै जुवाडेले ताकेता गरेपनि ताउलेले अझैसम्म रकम फिर्ता गरेका छैनन् । अहिले उक्त घटनाबारे एसपी कार्कीलाई समेत जानकारी भइसकेको छ ।
बाँकेमा हवल्दार खानको नेतृत्वमा ताउलेसहित प्रहरी हवल्दार राम सुमन चौधरी, सहायक हवल्दार शशी शाह, प्रहरी सहायक हवल्दार गंगाराम मल्ल, प्रहरी जवान विनोद केसी घुमुवाका रुपमा परिचालन छन् । जुवाडेहरुसँग मात्र होइन उनीहरुले तस्करसँग पनि रकम असुल्दै आएका छन् ।
एसपी कार्कीलाई गुम्राहमा राखेर उनीहरुले तस्करका नाइके र हुन्डी कारोवारीसँग मोटो रकम असुल्दै आइरहेको प्रमाण अनलाइन खोजखवरलाई प्राप्त भएकोे छ ।
Discussion about this post