बाँके कात्तिक १४ गते ।
भेरी अस्पताल नेपालगन्जका प्रमुख मेडिकल सुपरिटेन्डेन्ट डा. निराजन सुवेदीले आज बाँकेका पत्रकारहरुसँग भेटघाट गरेका छन् । मेसु भएर आएको एक महिनापछि उनले पत्रकारहरुसँग भेटघाट गर्दै यो अबधिमा आफ्नातर्फबाट भएका कार्यहरुको बारेमा जानकारी गराउँदै अस्पताल सुधारमा सबैको सहयोग र समन्वयमा जोड दिए ।
उनले सहयोगका लागि आग्रह समेत गरे । उनले यो अबधिमा भेरी अस्पतालमा एमडी÷एमएस अध्ययनको बाटो खुलेको बताए । अबको केहिदिन पछि भेरी अस्पतालका कन्सल्टेन्ट चिकित्सकहरुले न्याम्सबाट एकेडेमिक उपाधी पाउने पनि उनले जानकारी दिए । अस्पताललाई शैक्षिक गतिविधिका हिसावले चलाएमान बनाउनका निमित्त यो सबैभन्दा बढी महत्वपूर्ण र उपलब्धीमुलक हो । त्यसैगरी उनले अस्पताल फार्मेसीलाई पनि सुधारको प्रयास प्रारम्भ गरेको जानकारी दिए ।
बीमाका बिरामीहरुले गुणस्तरीय औषधि अस्पताल फार्मेसीबाटै प्राप्त गरुन भन्ने उद्देश्यका साथ तिहारपछि टेण्डर आव्हान गरि यो समस्यालाई हल गरिन लागिएको पनि उनले जानकारी दिए । ‘अस्पतालका सिनियर चिकित्सकहरुसँगको छलफलबाट यो कदम चालिन लागिएको हो उनले भने–‘अव अस्पताल फार्मेसीबाट बीमाका बिरामीहरुले क्यान्सर बाहेकका सबै औषधि प्राप्त गर्नेछन् । ती गुणस्तरीय हुनेछन् ।’
औंषधी खरिद सबैभन्दा अपारदर्शी बनेको भन्दै त्यसलाई व्यवस्थित गर्न टेण्डर आव्हान गर्न लागिएको उनको भनाइ छ । उनले आफु आएपछिका कार्यमात्र सुनाएनन् अस्पतालका समस्या पनि सुनाए । अस्पताललाई अहिले करिव २२ करोड दायित्व छ । उनले यो सिर्जित दायित्वलाई चुवाहटको आशंका समेत गरेका छन् । ‘गतवर्षकै दायित्व २२ करोड हाराहारीमा छ । बीमालाई तिर्नुपर्ने ८–९ लाख होला । १३ करोड अरु नै हो ।
विशिष्टिकृत सेवा प्रवाहका क्रममा केही उपकरण थप्ने काम भए होलान । तर चुहावट पनि भएको छ’ उनले भने । कुन–कुन शीर्षकमा कसरी दायित्व सिर्जना भयो त्योबारे भने उनले खुलेर जवाफ दिएनन् । उक्त दायित्व अस्पताल विकास समितिबाटै व्यवस्थापन गरिने उनले बताए । नयाँ भवनको पूर्णता नहुनु, सीमित जनशक्ति, उपकरणको प्रयाप्त नहुनु लगायतका कारणले प्रभावकारी सेवा प्रवाह गर्न नसकिएको उनको भनाइ छ । उनले अझैपनि अस्पतालसँग सिटिक्यान मेसिनको अभाव रहेको बताए ।
उनले सिटिस्क्यान मेसिनको अभावमा बिरामीलाई बाहिर रिफर गर्नु परेको बाध्यात्मक अवस्था पनि सुनाए । बिरामीको चापको आधारमा अहिलेको सिटिस्क्यान मेसिन भन्दा आठ गुणा क्षमताको मेसिन आवश्यक रहेको र त्यसका लागि पहल भइरहेको पनि बताए । अप्रेसन बेडको अभावका कारण अप्रेशन गर्नुपर्ने बिरामीलाई महिनौ दिनको प्रतिक्षा गर्नुपर्ने अवस्था रहेको पनि उनको भनाइ छ ।
यस्तै अस्पताल विकास समितिका अध्यक्ष विरेन्द्र बहादुर शाह अस्पतालको आर्थिक सुधारको पाटो आवश्यक रहेको बताए । उनले त्यहीअनुसारको कदम चालिएको पनि उल्लेख गरे । उनले संघीय अस्पताल भएकाले संघीय सरकारले पनि सहयोग गर्न आवश्यक रहेकोमा जोड दिए ।
पूर्वाधार र उपकरणमा संघीय सरकारले सहयोग गर्ने र अन्य कामहरु अस्पताल विकास समितिले गर्न सक्ने भएकाले अस्पताललाई बिरामीको भरोसाको केन्द्र बनाउन सकिने उल्लेख गरे ।
Discussion about this post