बाँके कात्तिक २८ गते ।
नेपालगन्जस्थित यातायात ब्यवस्था कार्यालय कोहलपुर सार्न खोजेको भन्दै जनता समाजवादी पार्टी नेपाल (जसपा) ले बुधवार नेपालगन्जमा प्रदर्शन गरेको छ । लुम्विनी प्रदेश सरकारले सदियौँदेखि नेपालगन्जमा रहेको यातायात ब्यवस्था कार्यालय कोहलपुर स्थानान्तरण गर्न खोजेको भन्दै प्रदर्शन गर्नुका साथै लुम्विनी प्रदेशका मुख्यमन्त्री चेतनारायण आचार्यलाई ज्ञापन पत्र बुझाएको हो ।
नेपालगन्ज उपमहानगरको कार्यालयबाट सुरु भएको प्रदर्शन जिल्ला प्रशासन कार्यालय बाँके अगाडी कोण सभामा परिणत भएको थियो । सो अवसरमा जसपा नेपालका केन्द्रिय सचिव कमरुद्धिन राई, केन्द्रिय सदस्य समेत रहेकी लुम्विनी प्रदेश सभा सदस्य अम्विका काफ्ले केन्द्रिय सदस्य बेबी तबस्सुम अन्सारी र जिल्ला अध्यक्ष कौशल धोवीले बाँकेमा प्रमुख जिल्ला अधिकारी खगेन्द्रप्रसाद रिजालमार्फत लुम्विनी प्रदेशका मुख्यमन्त्री आचार्यलाई ज्ञापन पत्र बुझाएको थियो ।
कोण सभामा जसपा नेपालका केन्द्रिय सचिव राईले नेपालगन्जमा रहेको यातायात ब्यवस्था कार्यालय बाहिर लैजाने प्रयास गरिए त्यसबाट उत्पन्न परिस्थितिको भागिदार प्रदेश सरकार हुनुपर्ने बताए । उनले केन्द्र र प्रदेश सरकारले नेपालगन्जलाई बेवास्ता गरेका कारण आर्थिक अवस्था खस्किदै गएको बताए । ‘संघियता लागू भएदेखि नेपालगन्ज हेपिदै आएको छ । धेरै सरकारी र गैसरकारी कार्यालय रातारात नेपालगन्जबाट अन्यत्र सारिएका छन् । अव फेरि त्यस्तै हर्कत गरे नेपालगन्जबासी चुप लागेर बस्ने छैनन्,’ उनले भने ।
सो अवसरमा लुम्विनी प्रदेश सभा सदस्य अम्विका काफ्लेले पनि नेपालगन्जबाट यातायात ब्यवस्था कार्यालय सार्न खोजिए त्यसको परिणाम नराम्रो हुने चेतावनी दिइन् । उनले केन्द्र र प्रदेश सरकारका कारण नेपालगन्ज दिन प्रतिदिन ओझेलमा पर्दै गएको बताइन् ।
ज्ञापन पत्र बुझ्दै बाँकेका प्रमुख जिल्ला अधिकारी रिजालले जसपा नेपालले बुझाएको ज्ञापन पत्र आजै मुख्यमन्त्रीलाई बुझाउने प्रतिवद्धता जनाए ।
Discussion about this post