बर्दिया माघ २७ गते ।
कर्णाली नदीको भंगालो सुकेपछि पानी र आहाल खोज्दै २० वटा गैंडा भारतीय आरक्षमा पुगेका छन् । बर्दियामा गैंडाको संख्या १६ मा सीमित भएको बर्दिया निकुञ्जका अधिकारीहरुले बताएका छन् । २०७१ र ७४ सालमा आएको बाढीले ढुंगा र बालुवा थुपारेपछि कर्णाली नदीको भंगोलो गेरुवा नदीले धार परिवर्तन गर्यो ।
पहिले कर्णालीको ८० प्रतिशत पानी वग्ने गेरुवामा ७४ साल यता निकै थोरै पानी वग्छ । यसको असर बर्दिया राष्ट्रिय निकुञ्ज र मध्यवर्ती सामुदायिक वनमा रहेका वन्यजन्तुलाई परेको छ । पर्याप्त पानी नहुनु, आहालको अभावका कारण गैडाहरु भारतीय आरक्षमा जान थालेका छन् । खाता जैविक मार्ग हुँदै २० वटा गैडा भारतीय निकुञ्जमा गएका हुन् ।
भारतीय आरक्षमा पर्याप्त पानी, आहाल खेल्न बनाइएको दलदले पोखरीले गैडाहरु त्यतै लोभिएको बर्दिया राष्ट्रिय निकुञ्जका प्रमुख संरक्षण अधिकृत अशोक कुमार राय बताउँछन् । भारतीय आरक्षमा पुगेका गैडा नेपाल फर्किने सम्भावना कम रहेको अधिकारीहरु बताउँछन् । जिपिएस रेडियो कलर नभएका कारण उता गएका गैडाहरुको अवस्था थाहा हुदैन् ।
भारतीय निकुञ्जमा चरिचरणका लागि राम्रो व्यवस्था भएकाले पनि गैडाहरु उताबाट फर्किने सम्भावना नभएको संरक्षणकर्मी हरी गुरुङको भनाइ छ । सन् १९८४ मा चितवनबाट पहिलो पटक बर्दिया निकुञ्जमा पाँच भाले र ८ पोथीसहित १३ वटा गैडा स्थानान्तरण गरिएको थियो । पछिल्लो पटक गरिएको गणनामा बर्दियामा ३६ वटा गैडा रहेकोमा अहिले घटेर १६ मा सीमित भएको छ ।
Discussion about this post