बाँके माघ ७ गते ।
राजनीतिक दलका एक नेताको हस्तक्षेपकारी भूमिकाका कारण नेपालगन्ज उपमहानगरपालिका वडा नं. ३ स्थित दारुल उलूम फैजुन्नबी जामा मस्जिद इदगाह संचालक समिति विवादित बनेको छ । ति नेताले आफ्ना दल र निकटका ब्यक्तिलाई संचालक समितिमा राखेपछि उक्त समिति विवादमा तानिएको हो ।
साधारण सभाको नाममा तदर्थ समितिलाई बाईपास गरि उपस्थिती पुस्तिकामा हस्ताक्षर भएको कागजलाई सर्वसम्मत कार्यसमिति चयन गरेको कोठे निर्णयलाई आधाकारिकता दिन प्रयास गरेपछि ति नेताको चर्को आलोचना भइरहेको छ । तदर्थ समितिका संयोजक समेत रहेका नेपालगन्ज उपमहानगरपालिका ३ का वडा अध्यक्ष अय्युब सिद्दिकीले संचालक समिति चयन प्रक्रिया अवैधानिक भएको बताए ।
उनले संचालक समिति चयन प्रक्रिया नमिलेको भन्दै चयन गरिएको भनिएको नयाँ कार्यसमितिलाई स्विकार्न नसकिने बताए । ‘नयाँ कार्यसमिति सरासर अवैधानिक छ । अवैधानिक तरिकाले गठन भएको समितिलाई मान्यता दिन सकिदैन । वैधानिक तरिकाले समिति गठन नहुँदासम्म तदर्थ समिति नै आधिकारिक हो,’ उनले भने ।
नयाँ कार्यसमिति चयन भएको भनिएको समितिमा अधिकांश पदाधिकारी राजनीतिक दलका नेता छन् भने नेपालको प्रचलित कानुन तथा नीति विपरित निर्वाचन समितिमा बसेका ब्यक्तिलाई समेत पदाधिकारी बनाइएको छ । ‘निर्वाचन समितिमा भएका ब्यक्ति सदस्य र पदाधिकारीमा बस्न मिल्दैन ।
निर्वाचन मण्डलका ब्यक्तिलाई जवरजस्ती कार्यसमितिमा राख्नु नेपालको प्रचलित कानुन र नीति विपरित छ,’ वडा अध्यक्ष सिद्धिकीले भने, ‘केहि ब्यक्ति र नेता कोठामा बसेर गरेको निर्णय कुनै हालतमा मान्न सकिदैन ।’
राजनीतिक दलका नेताको संरक्षणमा माघ १ गते भएको अधिवेशनमा उपस्थितलाई हाजिरी पुस्तिकामा हस्ताक्षर गर्न लगाएर त्यहि हस्ताक्षरलाई कार्यसमिति चयन गर्ने निर्णयमा प्रयोग गरिएको मुस्लिम अगुवाले आरोप लगाएका छन् । कार्यसमिति चयन प्रक्रिया अगाडी नबढाएर अधिवेशनमा उपस्थितले गरेको हस्ताक्षरको दुरुपयोग गरिएको एक मुस्लिम अगुवाले आरोप लगाए । ‘कोठामा गुपचुप बसेर आफूलाई मन परेको र आफूले भनेको मान्ने अर्थात रबर स्ट्याम्प प्याडलाई अध्यक्ष बनाइएको छ । यो सरासर गलत भएको छ,’ ति मुस्लिम अगुवाले भने ।
बाँकेमा नाम चलेका र मन्त्री समेत भइसकेका ति नेताले आफू खुसी ज्याउल हक हलवाईको अध्यक्षतामा १७ सदस्यीय कार्यसमिति गठन गरि सार्वजनिक गरेको मुस्लिम अगुवाले आरोप लगाएका छन् । ‘आफूले भनेको ठाउँमा छाप लगाउने ब्यक्तिलाई रोजी–रोजी कार्यसमितिको पदाधिकारी र सदस्य बनाउने काम भएको छ,’ मुस्लिम अगुवाले भने ।
बाँके प्रशासनले गत जेठ २८ गते सोमवार दारुल उलुम फैजुन्नबी जामा मस्जिद इदगाह संचालक समिति भंग गरि तदर्थ समिति गठन गर्न निर्देशन दिएको थियो । यसअघि पनि राजनीतिक दलका नेताको परछाईँमा परेको समितिले ति नेतालाई जिताउन निर्वाचन खर्च मस्जिदको रकम उपलब्ध गराएको आरोप लागेको छ ।
राजनीतिक दलका नेताकै कारण हरेक पाँच वर्षमा नयाँ कार्यसमिति चयन हुने प्रावधानलाई मिचेर करिब ८ वर्षसम्म अधिवेशन तथा निर्वाचन नगरेपछि प्रशासनले समिति भंग गरि तदर्थ समिति गठन गर्न निर्देशन दिएको थियो । कार्य अवधि पुगेको र जामा मस्जिद संचालक समितिका अधिकांश पदाधिकारी तथा सदस्यले राजीनामा दिएका कारण बाँके प्रशासनले समिति भंग गरि तदर्थ समिति गठन गर्न र अधिवेशन गरि नयाँ कार्यसमिति चयन गर्न निर्देशन दिएको थियो,’ वडा अध्यक्ष सिद्धिकीले भने ।
समितिले जनताको भावना अनुसार काम गर्न नसकेपछि जिल्ला प्रशासन कार्यालय बाँकेले समिति भंग गरि तीन महिनाभित्र नयाँ समिति गठन गर्न निर्देशन दिएको उनले बताए ।
स्थानीय प्रशासनको निर्देशनपछि सरोकारवालाले त्यसैदिन नेपालगन्ज उपमहानगरपालिका ३ निवासी समेत रहेका वडा अध्यक्ष अय्युब सिद्दिकीलाई तदर्थ समितिको संयोजक बनाएका थिए ।
संयोजक सिद्धिकीका अनुसार बाँकेका सहायक प्रमुख जिल्ला अधिकारी जोरासिंह माझीले तीन महिनाभित्र संस्था नवीकरण र साधरणसभाबाट नयाँ नेतृत्व गठन गरी जानकारी गराउन निर्देशन दिएपनि राजनीतिक स्वार्थ समुहको दवावमा आफूलाई समेत थाहा नदिएर गुपचुप रुपमा अध्यक्ष सहित कार्यसमिति चयन गरिएको बताए ।
दारुल उलूम फैजुन्नबी जामा मस्जिद इदगाह संचालक समितिमा १ हजार ९ सय २७ जना साधारण सदस्य छन्, तर राजनीतिक दवाव र प्रभावमा अधिकांश सदस्यलाई साधारणसभा बारे थाहा नदिएर आफु अनुकूलका केही व्यक्तिहरुलाई मात्रै साधारणसभामा बोलाएर हलवाईलाई अध्यक्ष बनाइएको भन्दै साधारण सदस्यहरुले कोठामा बसेर गठन गरिएको समिति तत्काल खारेज गर्न माग गरेका छन् ।
यो पनि पढ्नुहोस् ।
जामा मस्जिद इदगाह संचालक समितिको गुपचुप नेतृत्व चयन गरिएपछि तीब्र असन्तुष्टि, सिडिओलाई ज्ञापनपत्र
Discussion about this post