बुटवल माघ ८ गते ।
लुम्बिनी प्रदेश सभामा लुम्बिनी अनुसन्धान प्रशिक्षण प्रतिष्ठानको स्थापना सञ्चालन तथा व्यवस्थापन गर्न बनेको विधेयक पेश भएको छ ।
प्रदेश सभाको पाँचौं अधिवेशनको चौथो बैठकमा उक्त विधेयक मुख्यमन्त्री चेतनारायण आचार्यका तर्फबाट भौतिक पूर्वाधारमन्त्री भूमिश्वर ढकालले पेस गरे। बैठकको बिशेष समयमा बोल्दै प्रदेशसभा सदस्यहरुले प्रदेशमा बढ्दो सवारी दुर्घटना न्यूनीकरण गर्न, छाडा चौपाया नियन्त्रण गर्न, रातो किताबमा उल्लेख भएका योजना अहिलेसम्म पनि ठेक्का लाग्न नसकेको र सरकारले विकास बजेट खर्च गर्न नसकेको भन्दै सदनमार्फत सरकारको ध्यानाकर्षण गराएका थिए ।
प्रदेश सभा सदस्यहरुले उठाएका प्रश्नहरुको जवाफ दिँदै भौतिक पूर्वाधार विकासमन्त्री भूमिश्वर ढकालले सरकार जनताका समस्या समाधान गर्न तदारुकतासाथ लागिपरेको र आगामी जेठ मसान्त सम्म प्रदेश सरकारका योजना सम्पन्न गर्नेगरी निर्देशन भएको र काम भैरहेको सदनलाइ जानकारी गराएका छन् । बैठकमा प्रदेश सभा सदस्य विश्वप्रेम पाठकले अघिल्लो बर्षको दायित्व भुक्तानी ढिलाई हुदा परेको समस्या सुनाएका थिए। उनले यो समस्याको उचित निकास निकाल्न सदन मार्फत सरकारलाई आग्रह गरेका छन् ।
‘सदनमा कुरा उठ्छन् तर, त्यो कार्यान्वनयनमा गएको देखिदैन’उनले भने,‘सदनमा उठ्ने हरेक कुराको सुनुवाई हुन जरुरी छ ।’ प्रदेश सभा सदस्य अम्बिका काफ्लेले मधेश आन्दोलनका कारण मुलुकमा राजनीतिक परिवर्तन सम्भव भएको भन्दै ति उपलब्धिको रक्षामा ध्यान दिन आग्रह गरिन् । प्रदेश सभा सदस्य ईन्द्रकुमारी गहतराजले बालबालिकालाई दण्ड सजाय, मानसिक यातना दिने जस्ता घटनाको छानविन गर्न माग राखिन ।
‘बालबालिका माथि हुने असहज व्यवहार अन्त्य हुनुपर्छ । मानसिक स्वास्थ्य क्षेत्रमा लगानी गर्न जरुरी छ’उनले भनिन्,‘बालबालिकाहरुको स्वास्थ्यमा बिशेष ख्याल गर्न जरुरी छ। मनोसामाजिक परामर्श सेवा प्रदान गर्न जरुरी छ।’ प्रदेश सभा सदस्य मायाँ पुनले सार्वजनिक लेखा समितिको बैठक बसेर पुस मसान्त भित्र दायित्व भुक्तानीको लागि निर्देशन दिएको तर, अझैं पूर्ण कार्यान्वयन नभएको बताइन्। प्रदेश सभा सदस्य हेमा बेल्वासेले यातायात व्यवस्था कार्यालयमा सेवाग्राहीले दुःख पाईरहेको बिषय उठाइन। सवारी साधनको कर तथा नविकरणको शुल्क बुझाउन जाँदा १०० मिटरको लाईनमा बस्नुपर्ने अवस्था रहेको भन्दै ध्यानाकर्षण गराइन्।
प्रदेश सभा सदस्य लोका कुमारी विकले बजेट कार्यान्वयनको गति बढाउनुपर्ने बताइन। प्रदेश सभा सदस्य कृष्णाकुश्मा थारुले बर्दिया जिल्लामा बन्यजन्तुको आक्रमणबाट मानिसले ज्यान गुमाउनुपर्ने विकराल अवस्था रहेको भन्दै समस्या समाधान गर्न सरकारको योजना के छ भनेर सोधेकी छिन्। प्रदेश सभा सदस्य डिल्लीराज भुसालले बजेट विनियोजन भएर मात्रै नहुने, त्यसको कार्यान्वयन पक्ष बलियो हुनुपर्ने धारणा राखे।
लुम्बिनी प्रदेशका भौतिक पूर्वाधार विकास मन्त्री भूमिश्वर ढकालले सदनमा उठेका प्रश्नको जवाफ दिएका छन्। प्रदेश सभा सदस्यले राखेका प्रश्नहरुको जवाफ दिदै जेठ महिना योजना सम्पन्न गर्ने र असार महिना भुक्तानीको महिनाको रुपमा अघि बढाउनेगरी सरकारले तयारी गरेको बताए। ‘यस बर्ष भौतिक पूर्वाधार मन्त्रालय अन्तरगतका सबै आयोजना जेठ मसान्तलाई अन्तिम विन्दु मानेर काम सम्पन्न गर्न निर्देशन जारी गरिसकेका छौं। जेठ मसान्त योजना सम्पन्न गर्ने समय र असार महिना भुक्तानिको महिना हुनेछ’उनले भने,‘बहुबर्षिय आयोजना कार्यान्वयनले माघ १५ बाट गति लिन्छ। यसमा सरकारले काम गरिरहेको छ।’
Discussion about this post