बाँके माघ ९ गते ।
नेपालगन्ज उद्योग वाणिज्य संघको आयोजनामा यही माघ १० गतेदेखि नेपालगन्जमा प्रादेशिक महोत्सव २०८१ आयोजना हुँदैछ। ‘उद्योग, व्यापार, कृषि, जडीबुटी, रोजगार, सूचना प्रविधि र पर्यटन व्यावसायिक उद्यमशाला तथा कला संस्कृतिको प्रवद्र्धन’ भन्ने मूल नाराका साथ आयोजित महोत्सवको उद्घाटन पूर्वप्रधानमन्त्री पुष्पकमल दाहाल ‘प्रचण्ड’ले गर्ने कार्यक्रम तय भएको छ ।
नेपालगन्ज उद्योग वाणिज्य संघले साढे दुई दशकदेखि क्षेत्रीय आर्थिक गतिविधिलाई सबल बनाउन मेला, प्रदर्शनी र महोत्सवको आयोजना गर्दै आइरहेको छ । यस वर्षको महोत्सवले लुम्बिनी, कर्णाली र सुदूरपश्चिम प्रदेशका खाद्यवस्तु, जडीबुटी, कृषि उत्पादन, हस्तकला, अटोमोबाइल्स र सूचना प्रविधिका नवीनतम प्रविधिहरूलाई प्रदर्शनमार्फत बजारीकरणमा सहयोग पुर्याउने अपेक्षा गरिएको छ ।
महोत्सवमा कृषि, जडीबुटी, हस्तकला र सूचना प्रविधिका ३५० भन्दा बढी स्टलमा स्थानीय तथा राष्ट्रिय उत्पादनका विविध वस्तुहरू राखिने छ । थारू संस्कृति झल्किने विशेष प्रदर्शनी, सांस्कृतिक कार्यक्रम विद्यालयस्तरीय प्रतियोगिता, प्रवद्र्धन प्रदर्शनी युवाहरूका लागि रोजगारीसम्बन्धी जानकारी उपलब्ध गराइने आयोजक संघका अध्यक्ष टंक बहादुर धामीले जानकारी दिए । कोरोना महामारी र आर्थिक मन्दीबाट प्रभावित पश्चिम नेपालका उद्योगी तथा व्यवसायीहरूलाई एउटै थलोमा राखेर महोत्सवले नयाँ अवसर सिर्जना गर्ने अपेक्षा गरिएको छ ।
स्थानीय उत्पादनको बजारीकरण, राष्ट्रिय अर्थतन्त्रलाई सबल बनाउने र व्यावसायिक गतिविधिलाई प्रोत्साहित गर्न यो महोत्सव महत्वपूर्ण हुने संघका अध्यक्ष धामीले बताए । महोत्सवमा थारू संस्कृति झल्काउने प्रस्तुतिहरू, स्थानीय जातीय नृत्य, र व्यावसायिक उद्यमशालाको प्रदर्शनले नेपालगन्ज क्षेत्रको सांस्कृतिक तथा व्यावसायिक विविधता उजागर गर्नेछ । महोत्सवले क्षेत्रीय विकास, पर्यटन प्रवद्र्धन, रोजगार सिर्जना र स्थानीय उत्पादनलाई राष्ट्रियस्तरमा पु¥याउन महत्वपूर्ण भूमिका खेल्नेछ।
सम्पूर्ण नागरिक, उद्योगी, व्यवसायी र राजनीतिक दललाई महोत्सवमा सहभागिता जनाई सफल बनाउन अपिल गरिएको छ । महोत्सवमा रोजगार प्रवद्र्धन सम्बन्धी प्रदर्शनी हुने संघले जनाएको छ । महोत्सव आयोजना गर्न एक करोड खर्च हुने र करिव ५० लाख रूपैयाँ आम्दानी हुने अनुमान गरिएको छ । महोत्सवबाट आउने आम्दानी व्यवसायिक हितमा उपयोग गरिने संघले जनाएको छ ।
Discussion about this post