बुटवल चैत २४ गते ।
लुम्बिनी प्रदेश सरकारले गर्मीयाम सुरु भइसकेकोले वनडढेलो, आगलागी, हावाहुरीलगायतका जोखिमबाट हुने प्रकोपजन्य घटना नियन्त्रणमा तदारुकता देखाएको छ । प्रदेश सरकारले भूकम्प, बाढी, पहिरो, चट्याङ, असिना, हावाहुरी तथा अतिवृष्टिको जोखिम रहेको औँल्याउँदै प्रकोप न्यूनीकरण गर्न बेलैमा ध्यान दिएको हो ।
यसैबिच लुम्बिनी प्रदेश विपत् व्यवस्थापन परिषद्को बैठकले गर्मीयाममा विभिन्न प्रकारको महामारी, आगलागी, सडक तथा औद्योगिक दुर्घटनाको समेत जोखिम रहेकाले प्रकोप न्यूनीकरणतर्फ बेलैमा ध्यान दिनुपर्ने सुझाव दिएको छ । मुख्यमन्त्री चेतनारायण आचार्यको अध्यक्षतामा हालै सम्पन्न बैठकले पाल्पाको पर्यटकीय स्थल रानीमहलको नदी कटान संरक्षण, तानसेनको सुकुमवासी बस्ती सुरक्षा, बाँकेको राप्ती नदी कटान जोखिम न्यूनीकरण, कर्णाली नदीको बर्दिया राष्ट्रिय निकुञ्जसँग जोडिएको क्षेत्रमा सिँचाइको काम अघि बढाउन बजेट छुट्याउने निर्णय गरेको छ ।
प्रदेश विपत् व्यवस्थापन परिषद्को बैठकले विभिन्न ११ वटा एजेन्डामा छलफल गरेको मुख्यमन्त्रीका प्रेस सल्लाहकार दशरथ घिमिरेले जानकारी दिए । मुख्यमन्त्री आचार्यले प्रभावकारी विपत् व्यवस्थापनका लागि विपत्पूर्व, विपत् भएको अवस्था र विपत्पश्चात्को अवस्थालाई ध्यानमा राखेर प्रभावकारी काम अघि बढाएको बताउनुभएको प्रेस सल्लाहकार घिमिरेले बताए । लुम्बिनी प्रदेश आन्तरिक मामिला तथा कानुन मन्त्रालयका अनुसार चालु आर्थिक वर्ष २०८१ को नौ महिनामा जम्मा एक हजार ७५२ वटा विपत्जन्य घटना भएका छन् भने विपत्मा परी २९८ जनाको मृत्यु भएका छन् ।
त्यसै गरी ६४१ जना घाइते भएका छन् भने १८ जना अझै बेपत्ता छन् । मन्त्रालयका अनुसार २०८० को तुलनामा २०८१ मा मानवीय क्षति बढी भएको छ । गत वर्ष एक हजार १२० घटना भएका थिए । ७६ जनाको मृत्यु भएको थियो । १९६ जना घाइते भएका थिए । लुम्बिनी प्रदेश सरकारले चालु आव २०८१÷८२ मा राहत र पुनर्निर्माणका लागि एक करोड २१ लाख २२ हजार रुपियाँ वितरण गरेको छ ।
राहतका लागि एक करोड छ लाख ३७ हजार रुपियाँ र पुनर्निर्माणका लागि १४ लाख ८५ हजार रुपियाँ वितरण गरिएको मुख्यमन्त्री कार्यालयले जनाएको छ । प्रदेश सरकारले विपत् राहतलाई बिमासँग जोड्ने र सीप तथा उत्पादनसँग सम्बन्धित बनाउने योजना अघि सारेको जनाएको छ । सरकारले राहत वितरणमा ढिलाइ हुन नदिन जिल्ला तहबाट आउने सिफारिस छिटो आउने वातावरण बनाउन प्रमुख जिल्ला अधिकारीलाई आग्रह गरेको छ ।
Discussion about this post