बाँके चैत २७ गते ।
नेपाल पत्रकार महासंघ बाँकेले दिवंगत पत्रकार सुरेश रजकप्रति श्रद्धान्जलीसँगै मृत आत्माको चिर शान्तिको कामना गरि नेपालगन्जस्थित विपी चोकमा दीप प्रज्ज्वलन गरेको छ । राजावादीहरुको आन्दोलनको समाचार संकलन गर्न गएका बेला अज्ञात समुहले लगाएको आगोमा परि पत्रकार रजकको चैत १५ गते काठमाडौँस्थित तिनकुनेमा मृत्यू भएको थियो ।
पत्रकार रजकको मृत्यू भएदेखि नेपाल पत्रकार महासंघ आन्दोलनमा छ । दोषीको पहिचान गरि कारवाहीको माग गर्दै आन्दोलनरत महासंघ केन्द्रिय समितिको कार्यक्रम अनुसार १३ औँ दिनको पुण्य तिथि पारेर महासंघ बाँकेले श्रद्धान्जीसँगै दीप प्रज्ज्वलन गरेको अध्यक्ष नवीन गिरीले बताए ।
उनले हत्यामा संलग्नको पहिचान गरि कानुनी दायरामा ल्याउन माग गर्दै हत्यामा संलग्न पक्राउ नपर्दासम्म आन्दोलन जारी रहने बताए । ‘पत्रकार महासंघ आन्दोलनमा छ । पत्रकार रजकको हत्यामा संलग्नहरु पक्राउ नपर्दासम्म आन्दोलन जारी रहने छ,’ उनले भने ।
रजक एभि न्यूज टेलिभिजनमा क्यामेरा पर्सनको रुपमा कार्यरत थिए ।
तिनकुनेस्थित एक घरमा जलेको अवस्थामा फेला परेका रजकको मृत्यू नभई हत्या भएको दावी महासंघले गर्दै आएको छ । ‘घटनामा संलग्नलाई पक्राउ नगरि वर्तमान सरकारले आलटाल गरिरहेको छ,’ उनले भने, ‘सत्य, तथ्य बाहिर नल्याउँदासम्म आन्दोलन जारी रहने छ,’ अध्यक्ष गिरीले भने ।
Discussion about this post