बाँके बैशाख २२ गते ।
बाँकेका प्रमुख जिल्ला अधिकारी (सिडिओ) धर्मराज जोशीले विद्यालयका संचालकलाई नेपालमै विद्यार्थीको पोशाक किन्न सुझाव दिएका छन् ।
नेपालगन्ज उद्योग बाणिज्य संघले आयोजना गरेको अन्तरक्रिया कार्यक्रममा सिडिओ जोशीले नेपालमै पोशाक खरिद नगर्ने विद्यालय सञ्चालकलाई जिल्ला प्रहरी कार्यालयको अतिथि बन्नु पर्ने बताएका हुन् ।
विद्यालयको पोशाक भारत पठाउने गरेको जनगुनासो आएको बताए । ‘विद्यालयले नै भारत पठाउने गरेको गुनासो छ । यस्तो कार्य अपराध हो । भारतीय बजारमा पोशाक किन्न पठाउने विद्यालय संचालक कारवाहीको भागिदार हुनुपर्ने छ,’ उनले चेतावनी दिँदै भने ।
बच्चालाई भारतमा पोशाक किन्न पठाएको भेटिएमा सिधै जिप्रकाको अतिथि बन्नुपर्ने उनको भनाई छ । ‘यो गम्भीर अपराध हो’, उनले भने, ‘सस्तो परोस् भनेर हो कि ? सञ्चालकलाई लाभका लागि हो ।
अभिभावकलाई सस्तो पार्न हो भने विद्यालयको शुल्क नै घटाउनुस् । यदि नाफा कमाउने उद्देश्यले मात्र हो भने ढिलो चाँडोे तपाईसँग हाम्रो भेट हुनेछ । तपाई जिप्रकाको अतिथि बन्नुपर्नेछ ।’ उनले राष्ट्रियता सस्तो र महंंगो भन्ने नहुने तर्क गरे ।
बाँके जिल्ला भरीका सबै निजी विद्यालयको एउटै पोशाक बनाउने सहमति गर्न सुझाव दिँदै उनले भने, ‘जिल्लाभरका विद्यालयको एउटै पोशाक बनाउन बाँकेबाट सुरुवात गरौं न त ।’
कार्यक्रमका सहभागीले कमिसनका लागि विद्यालय सञ्चालकले विद्यार्थीको पोशाक, कापी, कलम भारतबाट ल्याउन लगाउने गरेको आरोप लगाए । सो अवसरमा गार्मेन्ट व्यवसायीले भारत भन्दा नेपालमै गुणस्तरीय र सस्तो दरमा पोशाक उपलब्ध गराउन सकिने स्पष्ट पारे ।
Discussion about this post