बर्दिया जेठ २३ गते ।
सीमावर्ती भारतीय मुर्तिहा रेन्ज पोष्टले बर्दिया गुलरिया नगरपालिका–९ का वडाध्यक्ष हरिप्रसाद पासवानमाथि पक्राउ पुर्जी जारी गरेको छ । उनीमाथि भारतीय वन अपराध पंजिका (एच १) आपराधिक क्रियाक्लाप अन्तर्गत पक्राउ पुर्जी जारी गरेको हो ।
यसैगरी वन अपराधको आरोपमा गुलरिया–९का अनिल यादवमाथि पनि पुर्जी जारी भएको वडाध्यक्ष पासवानले बताए । भारतीय वनकर्मीले उनीहरुमाथि अखेटापहार ओसारपसार गरेको आरोप लगाएका छन् । वडाध्यक्ष पासवानले भारतीय वनरक्षकले नेपाली नागरिकमाथि कुटपिट र दुव्र्यवहार गरेको विरोधमा आवाज उठाएपछि आफूहरुविरुद्ध झुठो मुद्दा दायर गरेको बताए ।
भारतीय वनमा घाँस, दाउरा गरेबापत अवैधरुपमा रकम असुल्ने, नदिए कुटपिट गर्ने र दुव्र्यवहार गर्ने गरेकोले जनप्रतिनिधिको हैसियतले त्यसको विरुद्ध आवाज उठाएकोले झुठो आरोपमा पक्राउ पुर्जी जारी गरेको वडाध्यक्ष पासवानले जनाए । सशस्त्र प्रहरी बल ३१ नम्बर गणका सशस्त्र प्रहरी उपरीक्षक मानबहादुर शाहीले वडाध्यक्ष पासवान र यादवविरुद्ध पक्राउ पुर्जी जारी गरेको जानकारी पाएको बताए । यस सम्बन्धमा भारतीय समकक्षीसँग समन्वय भइरहेको उनको भनाइ छ ।
Discussion about this post