बाँके असार ४ गते ।
कोहलपुर नगरपालिकाले १० वटा सामुदायिक विद्यालयका बालबालिकाहरुलाई शैक्षिक सामाग्री वितरण गरेको छ । उपप्रमुखसँग बादी, गन्धर्व, अल्पसंख्यक तथा असहाय ७० जना बिद्यार्थीहरुलाई शैक्षिक सामाग्री वितरण गरिएको शिक्षा तथा खेलकुद शाखाका वरिष्ठ शिक्षा अधिकृत शिला गौतमले जानकारी दिइन् ।
करिव २ लाखको लागतमा १० वटा विद्यालयका ७/७ जना विद्यार्थीलाई झोला, कापी, कलम पेन्सिल, इलिजर लगायतको सेट प्रदान गरिएको हो । कोहलपुर नगरपालिका सभाहलमा बुधवार आयोजित एक कार्यक्रमका बीच नगर उपप्रमुख संगिता सुवेदीले आधारभूत तह (१–५) कक्षामा अध्ययनरत बालबालिकाहरुलाई शैक्षिक सामाग्री हस्तान्तरण गरिन् ।
उनले सामुदायिक विद्यालयमा अध्ययनरत अत्यन्तै निम्नआयस्तर भएका बालबालिकाहरुलाई पठनपाठनमा सहजताहोस् भन्ने उद्देश्यले शैक्षिक सामाग्री प्रदान गरिएको उनले बताए । कुनैपनि बालबालिकाहरु विद्यालयको पहुँच भन्दा वाहिर हुन नपरोस् भनेर नगरपालिकाले आयस्तर कमजोर परिवारका बालबालिकाहरुलाई शैक्षिक सामाग्रीसँगै छात्रावृत्तिको समेत व्यवस्थापन गर्दै आएको बताइन् ।
यस्तै कोहलपुर नगरपालिकाका प्रमुख प्रशासकीय अधिकृत मानबहादुर गिरीले बालबालिकाहरुलाई शिक्षाको पहुँचमा ल्याउने वातावरण सिर्जना गर्ने गरी पालिका अघि बढेको बताए । सामाजिक विकास समितिका संयोजक इश्वरी प्रसाद विकको अध्यक्षतामा भएको कार्यक्रममा शिक्षा शाखा प्रमुख रामबहादुर हमालले शुभकामना मन्तव्य व्यक्त गरेका थिए भने कार्यक्रमको सञ्चालन वरिष्ठ शिक्षा अधिकृत गौतमले गरेकी थिइन् ।
Discussion about this post