दाङ साउन २१ गते ।
दाङमा बर्सेनि उद्योग व्यापार बन्द हुने क्रम बढ्दै गएको छ । जिल्लामा व्यवसायको लगत कट्टा गर्ने व्यवसायी बर्सेनि बढ्न थालेका हुन् भने दर्ता गर्नेहरु पनि घट्दै गएका छन् । घरेलु तथा साना उद्योग कार्यालयमा दर्ता भएका साना उद्योग तथा वाणिज्य फर्मको लगत कट्टा गर्नेको आँकडा बर्सेनि बढ्दै गएको तथ्यांकले देखाएको हो ।
विगत आठ वर्षदेखिको तथ्यांकमा लगत कट्टा गर्ने बर्सेनि बढेको देखिएको हो । त्यस्तै घरेलु तथा साना उद्योग कार्यालयमा उद्योग दर्ताको रेकर्ड हेर्दा नयाँ दर्तामा उत्साह घट्दै गएको छ । बर्सेनि नयाँ उद्योग दर्ता हुने क्रम घट्दै गएको पाइएको हो । आव २०७४/७५ देखि आव २०८१/८२ सम्मका तथ्यांक हेर्दा नयाँ दर्तामा उत्साह देखिएको छैन ।
आव २०८०/८१ को तुलनामा गत आव २०८१/८२ मा ८१ वटा उद्योग र वाणिज्य फर्मको दर्ता घटेको छ । आव २०७९/८० को तुलनामा आव २०८०/८१ मा ४६० नयाँ दर्ता कम भएका थिए । आव २०७९/८० मा एक हजार ५६९ साना उद्योग दर्ता भएकोमा आव २०८०/८१ मा १ हजार १०९ उद्योग मात्रै नयाँ दर्ता भएका छन् । आव २०७५/७६ मा १ हजार ७२ नयाँ उद्योग कार्यालयमा दर्ता भएका थिए । आव २०७६/७७ मा ७३१ मात्रै उद्योग दर्ता भएका थिए ।
कोभिडका कारण त्यस वर्ष उद्योग दर्तामा उत्साह नदेखिए पनि आव २०७७/७८ मा भने नयाँ उद्योग दर्ता बढेको थियो । त्यस वर्ष २ हजार १८४ नयाँ उद्योग दर्ता भएका थिए । जसमा उत्पादनमूलक २०७, कृषि तथा वनजन्य उद्योगतर्फ १ हजार ५१२, पर्यटन उद्योगतर्फ १६८ र सेवामूलक उद्योग २९७ नयाँ दर्ता भएका थिए । आव २०७८/७९ मा अघिल्लो आवभन्दा ३५३ कम उद्योग दर्ता भएका हुन् ।
त्यस वर्ष उत्पादनमूलक १७३, कृषि तथा वन जन्य उद्योग १ हजार २६०, पर्यटन उद्योग १६१ र सेवामूलक उद्योग २३६ गरी १ हजार ८३१ नयाँ उद्योग दर्ता भएका थिए ।
Discussion about this post