बाँके साउन २० गते ।
वर्षाका कारण बाँकेको डुडुवा गाउँपालिका–४ सिधनिया घाटस्थित राप्ती नदीमा पानीको बहाव बढ्दै गइरहेको छ, तर स्थानीयलाई त्यसको प्रवाह छैन । पानीसँगै बगेर आएका दाउरा जम्मा गर्न राप्ती नदी किनारमा स्थानीयको भीड लागेको छ । स्थानीय ज्यानको जोखिम राखेर नदीमा पौडी खेलेरै दाउरा सङ्कलन गरिरहेका छन् ।
राप्ती नदीले बगाएर ल्याएका दाउरा जम्मा गर्न डुडुवा गाउँपालिकाका विभिन्न वडाका सयौँ स्थानीय मङ्गलबार बिहानैदेखि सिधनिया घाटमा व्यस्त देखिन्थे । नदीले माथिबाट बगाएर ल्याएका दाउरा स्थानीयले नदीको किनाराबाट लामो कैँची लौरो बनाएर त्यसैको माध्यमबाट तानेर बाहिर निकाल्ने गरेका छन् । कतिपय स्थानीय पौडी खेलेर नदीको मध्यभागमा पुगेर दाउरा निकाल्न सक्रिय देखिन्छन्।
डुडुवा–४ का स्थानीय खेमलाल सोनकरले बिहान ४ बजेदेखि नै दाउरा जम्मा गर्न नदी किनारामा आएको बताए । उनले अहिलेसम्म स्थानीयले ४०–५० ट्रक दाउरा जम्मा गरेको जानकारी दिए। जम्मा गरेका दाउरामध्ये ठुला नेपालगञ्जसम्म लगेर बिक्री गर्ने र साना दाउरा घरमै प्रयोग गर्ने तथा मोटा काठको गोलियाबाट मिलमा चिरानका लागि प्रयोग गर्ने बताए ।
अर्का स्थानीय विष्णुप्रसाद यादवले घरका सपरिवार दाउरा जम्मा गर्न आएको बताए । प्रहरी प्रशासनले भने जोखिम मोलेर दाउरा सङ्कन नगर्न भने पनि स्थानीयले ज्यान जोखिममा राखेर दाउरा सङ्कलन गरिरहेको देखिन्छ । यसमा प्रशासनले हस्तक्षेप भने गरेको छैन ।बर्खायाममा राप्ती नदीमा संकलित दाउराले वर्षभरि खाना पकाउन आवश्यक पर्ने गरेको तर ज्यानको जोखिम भने उतिकै रहेको दाउरा संकलकहरुको भनाई छ ।
Discussion about this post