बाँके भदौ १७ गते ।
बाँकेका आठ मध्ये सात वटा स्थानीय तहका पशु चौपायामा ‘लम्पी स्किन’ को सङ्क्रमण देखिएको छ ।
भेटेरिनरी अस्पताल तथा पशु सेवा विज्ञ केन्द्रका सूचना अधिकारी भोजबहादुर रावलले जिल्लाका सात वटा स्थानीय तहमा ‘लम्पी स्किन’ को संक्रमण देखिएको जानकारी दिए । सात स्थानीय तहका १५० भन्दा बढी पशु चौपायामा ‘लम्पी स्किन’को सङ्क्रमण देखिएको र सो बढ्ने क्रममा रहेको उनको भनाइ छ ।
‘लम्पी स्किन’को सङ्क्रमण देखिएका पशु चौपायाको प्रारम्भिक उपचारसँगै २५ हजार खोप माग गरिएको छ । बुधवारसम्ममा खोप आइपुग्ने र त्यसपछि लगाउने प्रक्रिया शुरु हुने सूचना अधिकारी रावलले बताए ।
राप्तीसोनारी, जानकी गाउँपालिका, कोहलपुर नगरपालिका, नरैनापुर गाउँपालिका, खजुरा, बैजनाथ र डुडुवा गाउँपालिकाका केही क्षेत्रमा लम्पी स्किन विज्ञ केन्द्रले जनाएको छ ।
जानकी गाउँपालिकाका पशु सेवा शाखाका प्रमुख दिलबहादुर खड्काले किसानलाई अनुदानमा ‘लम्पी स्किन’को औषधि उपलब्ध गराइएको र कतिपय औषधि नेपालमा नपाइएकाले भारतको रुपईडिहाबाट ल्याएर पनि लगाउने गरिएको बताए ।
राप्तीसोनारीका पशु सेवा शाखा प्रमुख जयबहादुर कार्कीले गाउँपालिकाको वडा नम्बर १, २ र ६ लगायतका वडामा सङ्क्रमण बढी देखिएकाले ‘भ्याक्सिन’का लागि विज्ञ केन्द्रलाई पत्राचार गरिएको बताए ।
बुधबारसम्म बाँकेमा खोप पुग्ने र त्यसलगत्तै स्थानीय तहलाई संक्रमणका आधारमा खोप वितरण गरिने भेटेरिनरी अस्पताल तथा पशु सेवा विज्ञ केन्द्र नेपालगञ्जले जनाएको छ ।
Discussion about this post