काठमाडौं असोज २८ गते ।
सन्दीप लामिछानेले करिअरमै दोस्रोपटक पाँच विकेट लिएपछि सोमबार नेपालले आइसिसी टी–२० विश्वकपअन्तर्गत एसियन छनोटमा कतारलाई ५ रनले हराएको छ । सुपर सिक्समा आफ्नो दोस्रो खेलमा पहिलो ब्याटिङ गरेको नेपालले २० ओभरमा नौ विकेट गुमाएर १४७ रनको मध्यम योगफल बनाएको थियो ।
प्रत्युत्तरमा कतारले १९.५ ओभरमा सबै विकेट गुमाएर १४२ रन बनाउँदा नेपाल रोमाञ्चक खेलमा ५ रनले विजयी भयो । जितसँगै नेपालले सुपर सिक्समा ६ अंक जोडेको छ । शीर्ष स्थानमा रहेको ओमानको पनि ६ अंक रहेको छ । ओमान रनरेटमा अगाडि छ ।
नेपाल र ओमान अर्को वर्ष भारत र श्रीलंकाले संयुक्त रूपमा आयोजना गर्ने आइसिसी टी–२० विश्वकपनजिक पुगेका छन् । नेपालले अब बुधबार ओमानसँग खेल्नेछ । ओमानलाई हराउँदा नेपालले लगातार दोस्रो र समग्रमा तेस्रोपटक विश्वकपमा स्थान बनाउनेछ । १४८ रन पछ्याएको कतारको ब्याटिङमा ओपनर लियानागे तथा जुबेर अलीले पहिलो विकेटका लागि उत्कृष्ट प्रदर्शन गरे ।
दुवैले पहिलो विकेटका लागि १० ओभरमा ७९ रनको साझेदारी गरी कतारलाई बलियो स्थितिमा राखे । इनिङ्सको दसौँ ओभरमै सन्दीपले लियानागेको विकेट लिँदै नेपाललाई खेलमा फर्काउने प्रयास गरेका थिए । इनिङ्सको १३औँ ओभरमा नेपालले कतारका दुई ब्याट्सम्यानलाई लगातार बलमा रनआउट गरेको थियो । मिर्जा मोहमद र मुहमद तन्भिर रनआउटको सिकार भए । दुई रनआउटसँगै नेपालले खेलमा पकड बनाएको हो । इनिङ्सको एक समय कतार ९२, २ को बलियो स्थितिमा थियो ।
तर, कतारले महत्वपूर्ण क्षणमा अन्तिम आठ विकेट केवल ४५ रनमा गुमायो । यद्यपि, क्रिजमा जुबेर अली रहँदासम्म कतार खेलमा माथि नै थियो । उनी इनिङ्सको १८।१ ओभरमा आउट भए । लियानागेले ३५ बलमा पाँच चौका र तीन छक्का प्रहार गरी ५६ रन बनजाए । अलीले ५५ बलमा दुई चौका र एक छक्का प्रहार गरी ५२ रन जोडेका थिए ।
नेपालमाथि सनसनीपूर्ण जित निकाल्न कतारलाई अन्तिम ओभरमा १० रन आवश्यक थियो । उत्कृष्ट फर्ममा देखिएका लेग स्पिनर सन्दीपले नै अन्तिम ओभर गरेका थिए । उनले पहिलो दुई बल डट फ्याँके । त्यसपछि १९.३ ओभरमा उनले विकेट लिए । कतारले त्यसपछिका दुई बलमा ३ रन जोडेको थियो । कतारलाई खेल सुपर ओभरमा पु¥याउन अन्तिम बलमा ६ रन चाहिएको थियो ।
खेलकै अन्तिम बलमा सन्दीपले वाइड फ्याँके । तर, मुजिब उर रहमान क्रिज छाडेर छक्का प्रहार गर्ने चक्करमा शेखबाट स्टम्पिङ भए । यससँगै नेपालले कतारमाथि रोमाञ्चक ५ रनको जित निकाल्यो । अर्कोतिर सन्दीपले टी–२० करिमरमै दोस्रोपटक पाँच विकेट लिए । उनले खेलमा ३।५ ओभर बलिङ गर्दै १८ रन खर्चेका थिए ।
Discussion about this post