भगतराम थारु
बाँके असार १७ गते । मृगौला पिडितलाई सहयोगार्थ प्रदान गर्नको लागि नेपालगन्जमा सांस्कृतिक कार्यक्रम आयोजना गरिने भएको छ ।
एकता युवा क्लवको आयोजना तथा परोपकार ब्रदर्शको सह आयोजनामा यही २० गते नेपालगन्जको सिएसटि होटलमा सांकृतिक कार्यक्रम सहितको सहयोगार्थ कार्यक्रम आयोजना गरिन लागेको हो । कोहलपुर नगरपालिका १ कौशिलानगरका २७ बर्षिय हेमन्त सिंह ठकुरी विगत ८ महिनादेखि मृगौलाका कारण थला परेका छन् । पिडित ठकुरीको उपचारका लागि करिव १५ लाख खर्च लाग्ने भएको हुनाले उहाँको उपचारमा सहजताका लागि नेपालगन्जमा सांस्कृतिक कार्यक्रम गरि सहयोगार्थ संकलन गरिन लागेको आयोजकले मंगलवार पत्रकार सम्मेलन गरि जानकारी गराएको छ । सहयोगार्थ कार्यक्रम साँझा ५ बजेदेखि १० बजे रातीसम्म संचालन गरिने आयोजकले जनाएको छ । कार्यक्रममा राष्ट्रिय तथा स्थानिय कलाकारहरुको बेजोड प्रस्तुती रहने आयोजक टिमका अध्यक्ष आशिष मल्लले जानकारी दिनुभयो । कार्यक्रममा राष्ट्रिय कलाकार नेपाल आइडल २ का विजेता रवि ओड, विशाल निरौला, उमा गुरुङ, निर्मला थापा मगर, मेघना मगर लगायतले मनोरञ्जन प्रदान गरिने सह आयोजक टिमका उपाध्यक्ष मंगल जिएमले जानकारी दिनुभयो । सल्यान जिल्ला घर भई कोहलपुर १ कौशिलानगर दिदिको घरमा बस्दै आएका मृगौला पिडित हेमन्तको आर्थिक स्थिति नाजुक भएकै कारण हेमन्त बचाउ अभियानमा लागेको जिएमले बताउनुभयो । सहयोगार्थ कार्यक्रम भएको हुनाले जति पनि राष्ट्रिय तथा स्थानिय कलाकारहरुलाई निशूल्क आफ्नो प्रस्तुती देखाउन आग्रह गरेअनुसार सहमति भएको आयोजकले जनाएको छ । सांस्कृतिक कार्यक्रममा ५ लाख खर्च हुने अनुमान आयोजकले गरेको छ ।
Discussion about this post