बाँके फागुन ३ गते ।
बाँके राष्ट्रिय निकुञ्जबाट आएका बाघको आँतक बढ्दै जाँदा सल्यान कालीमाटी गाउँपालिकाका बासिन्दा त्रसित बनेका छन् । एक सातामा तीन जनाको बाघको आक्रमणबाट ज्यान गएपछि कालीमाटी गाउँपालिकाका वडा न ५,६ र ७ का वासिन्दा त्रसित बनेका हुन ।
बाघको आक्रमणबाट तीन जनाको ज्यान गएको एक महिना बितिसक्दा समेत बाघ नियन्त्रणमा नआएको र अझै पनि बाघ देखि रहेकाले घरबाहिर निस्कनै गाह्रो भइरहेको स्थानीयको गुनासो रहेको छ ।
कालीमाटी गाउँपालिका ७ की तिला रानाले आजभोली रातमा त के दिउँसो नै घरबाहिरको दैनिक कामकाज गर्न निकै डर लाग्ने गरेको बताए । गाईवस्तुभाउलाई घाँस ल्याउन त घरनजिकै रहेको शौचालय जान पनि डराई डराई जानु पर्ने बाध्यता छ । उनले भने ।
घूइयाबारीकै गणपनि रानालाई पनि दैनिकी चलाउन निकै सकस परी रहेको छ । घर नजिकै रहेको जङ्गलमा जाऊँ नरभक्षी बाघ आएर आक्रमण गर्ला भन्ने डर नजाऊँ घरका बस्तुभाउ भोकै मर्लान् भन्ने पिर ।
मध्यवर्ती क्षेत्रमा पर्ने बस्तीका स्थानीयले आफूहरू असुरक्षित बनेको भन्दै वन्यजन्तुबाट जोगाउने प्रभावकारी व्यवस्था गर्न माग गरेका छन् । सुरक्षा व्यवस्था गर्न नसकिने अवस्था आए मध्यवर्ती क्षेत्र खारेज गर्नु पर्ने मागसमेत उठाउन थालेका छन् । स्थानीयको समस्या समाधानका लागि सरकार संवेदनशील बन्नु पर्ने कालीमाटी गाउँपालिका ७ का वडाध्यक्ष मित्रलाल रिजालले बताए । उनले निकुञ्ज क्षेत्र भित्र बसोबास गर्ने नागरिकको जीवन सुरक्षामा राज्यले जिम्मेवारी लिनु पर्ने भन्दै आवश्यक परे निकुञ्ज खारेज गर्नु पर्ने धारणा व्यक्त गरे ।
हात्तिदमार घुइयावारी मध्यवर्ती क्षेत्र उपभोक्ता समितिका अध्यक्ष डम्बर पुनले बर्दिया तथा बाँके राष्ट्रिय निकुञ्ज क्षेत्रबाट आएका बाघका कारण स्थानीय त्रसित भएर बाँच्नु परि रहेको बताए । दीर्घकालीन समाधानका लागि निकुञ्जले बाघको सङ्ख्या व्यवस्थापन गर्नु पर्ने तथा वन्यजन्तु बाहिरिनुको कारणबारे अध्ययन गरी कानुनी व्यवस्था परिमार्जन गर्नु पर्ने उनको भनाई छ ।
यता डिभिजन वन कार्यालय सल्यानले बाघ नियन्त्रणका लागि टोली लागि परेको बताएको छ । अहिले पनि बाघ देखि रहेको र त्यसको ट्रयाकिङ गर्ने काम विज्ञ टोलीबाट भइरहेको डिभिजन वन कार्यालय सल्यानका प्रमुख टेक बहादुर रावलले बताए । बाघको आक्रमणमा मृत्यु भएका परिवारलाई आवश्यक क्षतिपूर्ति दिनका लाग निर्देशनालयमा पत्राचार भइसकेको र निर्देशनालयले पैसा पठाउने बित्तिकै पीडित परिवारलाई वितरण गरिने उनको भनाई छ ।
गत पुस २३ गते सुर्खेत भेरी गङ्गा नगरपालिका ५ गेरुवानीकी ५७ बर्सिया गङ्गादेवी सारुमगर, पुस २५ गते कालीमाटी गाउँपालिका ७ की ४२ बर्सिया धनसरी रावत र २८ गते कालीमाटी ६ हात्तिढुंगाका ६५ वर्षीय चन्द्र बहादुर खप्तडीको बाघको आक्रमणबाट ज्यान गएको थियो ।
Discussion about this post