काठमाडौं फागुन ८ गते ।
आगामी फागुन २१ गते हुने प्रतिनिधि सभा सदस्य निर्वाचनको सुरक्षा व्यवस्थालाई सुदृढ बनाउन सशस्त्र प्रहरी बल परिचालन गर्नुपर्ने निर्देशन दिइएको छ।
सशस्त्र प्रहरी बल नेपालका कार्य विभाग प्रमुख अतिरिक्त महानिरीक्षक गणेश बहादुर ठाडा मगरले प्रधान कार्यालय हलचोक, स्वयम्भुबाट भर्चुअल माध्यममार्फत सबै इकाई प्रमुखहरूलाई निर्देशन दिएका हुन्।
निर्देशनका क्रममा उनले निर्वाचन सुरक्षालाई अभियानकै रूपमा लिएर सशस्त्र प्रहरी कर्मचारीहरू जिम्मेवार र सक्रिय रूपमा खटिनुपर्ने बताएका छन्। जिल्ला सुरक्षा समितिसँग समन्वय र सहकार्य गर्दै स्थानीय भौगोलिक अवस्था तथा सुरक्षा संवेदनशीलतालाई ध्यानमा राखी योजना बनाई कार्यान्वयन गर्न उनले जोड दिएका छन्।
अतिरिक्त महानिरीक्षक ठाडा मगरले फिल्ड तहमा देखिन सक्ने सम्भावित सुरक्षा चुनौती तथा समस्याको समयमै समाधान हुने गरी कार्ययोजना तयार गरी प्रभावकारी परिचालन गर्न निर्देशन दिएका छन्। साथै सूचना संकलनलाई उच्च प्राथमिकतामा राख्दै व्यावसायिक दक्षताको अधिकतम उपयोग गर्नुपर्नेमा उनले विशेष जोड दिएका छन्।
उनले निर्वाचनमा खटिँदा कुनै प्रकारको त्रुटि हुन नदिन सचेत रहन आग्रह गर्दै, आवश्यक परे बल प्रयोगको अवस्था सिर्जना भएमा मानवअधिकारका मापदण्डको पूर्ण पालना गर्न निर्देशन दिएका छन्।
Discussion about this post