काठमाडौं चैत ५ गते ।
निर्वाचन आयोगले प्रतिनिधिसभा सदस्य निर्वाचनको अन्तिम परिणाम आज राष्ट्रपति रामचन्द्र पौडेलसमक्ष पेश गर्ने भएको छ । आयोगले प्रत्यक्षतर्फ १६५ र समानुपातिकतर्फ ११० गरी कुल २७५ सदस्यको निर्वाचन परिणाम बुझाउने तयारी गरेको हो ।
आयोगका प्रवक्ता नारायणप्रसाद भट्टराईका अनुसार बिहीबार बिहान साढे ११ बजे समानुपातिकतर्फ निर्वाचित सांसदहरूलाई प्रमाणपत्र वितरण गरिनेछ । त्यसपछि अपराह्न ४ बजे राष्ट्रपतिलाई औपचारिक रूपमा निर्वाचन परिणाम बुझाइनेछ । उनले अपराह्न साढे ५ बजे पत्रकार सम्मेलन गरी विस्तृत जानकारी दिने कार्यक्रम रहेको बताए ।
निर्वाचन परिणाम राष्ट्रपतिसमक्ष बुझाइएसँगै नयाँ प्रतिनिधिसभा गठन, संसद् आह्वान तथा सरकार गठनको प्रक्रिया अघि बढ्नेछ ।
गत फागुन २१ गते सम्पन्न निर्वाचनमा राष्ट्रिय स्वतन्त्र पार्टी (रास्वपा) १८२ सिटसहित पहिलो दल बनेको छ । त्यस्तै नेपाली कांग्रेस ३८ सिटसहित दोस्रो, नेपाल कम्युनिस्ट पार्टी (एमाले) २५ सिटसहित तेस्रो र नेपाल कम्युनिस्ट पार्टी (नेकपा) १७ सिटसहित चौथो दल बनेका छन् । श्रम संस्कृति पार्टी सात सिटसहित पाँचौँ तथा राष्ट्रिय प्रजातन्त्र पार्टी पाँच सिटसहित छैटौँ स्थानमा रहेका छन् ।
निर्वाचन परिणामअनुसार प्रतिनिधिसभामा राष्ट्रिय दलका रूपमा छ वटा दलको प्रतिनिधित्व रहने भएको छ ।
Discussion about this post