दाङ वैशाख ४ गते ।
दाङको घोराही उपमहानगरपालिका–१७, कर्जाहीका किसान कृत्रिम जलाशयबाट उपलब्ध सिँचाइ सुविधाको उपयोग गर्दै उल्लेख्य आम्दानी गर्न सफल भएका छन्। करिब १० बिघा क्षेत्रफलमा निर्माण गरिएको जलाशयबाट सिँचाइ सुविधा पुगेपछि गाउँका अधिकांश किसान वर्षभरि व्यावसायिक तरकारी खेतीमा संलग्न भएका छन्।
२०७७ सालमा जलाशय निर्माण सम्पन्न भएपछि किसानहरूको दैनिकीमा उल्लेख्य परिवर्तन आएको स्थानीय कृषक कृष्णी चौधरीले जानकारी दिए। उनका अनुसार तरकारी खेतीबाट दैनिक एक हजारदेखि एक हजार पाँच सय रुपैयाँसम्म आम्दानी हुने गरेको छ। “पहिले मजदुरी गर्न जानुपर्थ्यो, अहिले घरनजिकै सिँचाइ सुविधा भएपछि व्यावसायिक खेतीमै लागेका छौँ,” उनले भने। हाल उनले १० कट्ठा जमिनमा तरकारी खेती गर्दै आएका छन्।
जलाशयबाट पम्पसेटमार्फत सिँचाइ गर्ने व्यवस्था मिलाइएकाले तरकारीसहित अन्य बाली उत्पादनमा पनि सहज भएको किसानहरूको भनाइ छ। यद्यपि पम्पसेट सञ्चालनमा लाग्ने खर्च भने किसानहरूले आफैं व्यहोर्दै आएका छन्।
सोही क्षेत्रका अर्का कृषक बाबुराम चौधरीले पनि जलाशयकै कारण खेती विस्तार गर्न सम्भव भएको बताए। सुरुमा घरायसी प्रयोजनका लागि मात्र खेती गर्दै आएका उनले हाल १५ कट्ठा जमिनमा व्यावसायिक तरकारी खेती गरिरहेका छन्। यसबाट भएको आम्दानीले थप १० कट्ठा जमिन किन्न सफल भएको उनले जानकारी दिए।
जलाशय निर्माणमा स्थानीयको सक्रिय सहभागिता उल्लेखनीय रहेको बताउँदै चौधरीले पालिकासँग समन्वय गरेर योजना अघि बढाइएको स्मरण गरे। “जलाशय बनेपछि पानीको अभाव हट्नुका साथै आर्थिक अवस्था सुधारिएको छ,” उनले भने, “वैदेशिक रोजगारीमा गएकाहरू समेत गाउँ फर्केर खेतीमा लाग्न थालेका छन्।”
हाल कर्जाहीका करिब एक सयभन्दा बढी घरपरिवार व्यावसायिक तरकारी खेतीमा आबद्ध छन्। किसानहरू बिहान सबेरै घोराही बजारमा पुगेर आफ्ना उत्पादन बिक्री गर्ने गरेका छन्।
Discussion about this post