काठमाडौें, साउन ११ गते ।
नेपालकै पहिलो आधुनिक सडक सुरुङमार्ग ‘सिस्नेखोला–नागढुंगा’ सोमबारदेखि औपचारिक रूपमा सञ्चालनमा आएको छ। पूर्वाधार विकासमन्त्री सुनील लम्साल, नेपालका लागि जापानका राजदूत माएदा तोरु तथा जापान अन्तर्राष्ट्रिय सहयोग नियोग (जाइका)का नेपाल प्रमुख मिजुकी मात्सुजाकीलगायतको उपस्थितिमा सुरुङमार्ग उद्घाटन गरिएको हो।
सुरुङमार्ग सञ्चालनमा आएसँगै निर्माणभन्दा पनि शिलान्यासका बेला राखिएको शिलालेखको विषय पुनः चर्चामा आएको छ। उद्घाटन समारोहमा बोल्दै मन्त्री लम्सालले २०७६ सालमा तत्कालीन प्रधानमन्त्री केपी शर्मा ओलीले शिलान्यास गर्दा राखिएको तर पछि हराएको शिलालेख खोजी गरी पुनःस्थापना गरिने घोषणा गरे।
उद्घाटनपछि सञ्चारकर्मीसँग कुरा गर्दै उनले सार्वजनिक आयोजनाको शिलालेख हराउनु उचित नभएको उल्लेख गर्दै त्यसबारे आवश्यक खोजी गरी पुनःस्थापना गरिने बताए।
नागढुंगा सुरुङमार्गको शिलालेख हटाइएको विषयमा विगतदेखि नै राजनीतिक तहमा बहस हुँदै आएको छ। तत्कालीन प्रधानमन्त्री ओलीको नाम उल्लेख भएको शिलालेख तोडफोड गरेर हटाइएको आरोप लगाउँदै विभिन्न राजनीतिक दल तथा नेताहरूले विरोध जनाउँदै आएका थिए।
सुरुङमार्ग निर्माणको प्रक्रिया भने विभिन्न सरकारको कार्यकालसँग जोडिएको छ। यसको सम्भाव्यता अध्ययन २०६६/६७ सालतिर तत्कालीन प्रधानमन्त्रीहरू झलनाथ खनाल र डा. बाबुराम भट्टराईको कार्यकालमा सुरु भएको थियो। २०७६ कात्तिक ४ गते तत्कालीन प्रधानमन्त्री केपी शर्मा ओलीले आयोजनाको शिलान्यास गरेका थिए। मुख्य सुरुङको ‘ब्रेकथ्रु’ भने पुष्पकमल दाहाल ‘प्रचण्ड’ प्रधानमन्त्री रहेका बेला सम्पन्न भएको थियो।
लामो निर्माण प्रक्रियापछि सुरुङमार्ग सोमबारदेखि औपचारिक रूपमा सञ्चालनमा आएको छ। यससँगै नागढुंगा–नौबिसे सडकखण्डको सवारी आवागमन सहज हुने र यात्रा समय घट्ने अपेक्षा गरिएको छ।
Discussion about this post