बाँके, साउन २४ गते ।
कुपोषणको समयमै पहिचान, उपचार र व्यवस्थापनलाई प्रभावकारी बनाउन डुडुवा गाउँपालिकाका ५९ जना स्वास्थ्यकर्मीलाई तीनदिने क्षमता अभिवृद्धि तालिम दिइएको छ।
डुडुवा गाउँपालिकाका वडा नं. १ देखि ६ सम्म कार्यरत स्वास्थ्यकर्मीलाई दुई चरणमा तालिम दिइएको हो। जिल्लामा सञ्चालित पोषण परियोजनाअन्तर्गत बाँके युनेस्को क्लबको प्राविधिक सहयोग, हेलन केलर इन्टरनेशनल नेपालको आर्थिक सहयोग तथा स्वास्थ्य कार्यालय बाँकेको आयोजनामा तालिम सञ्चालन गरिएको थियो।
तालिममा बालबालिकामा कुपोषण पहिचान, परीक्षण, उपचार, परामर्श, अभिलेखीकरण र प्रतिवेदन प्रणालीका साथै कुपोषण व्यवस्थापनका व्यावहारिक पक्षबारे प्रशिक्षण दिइएको थियो। ६ महिनाभन्दा कम तथा ६ देखि ५९ महिनासम्मका बालबालिकामा कुपोषण व्यवस्थापन, ओटिसीमार्फत उपचार, एन्थ्रोपोमेट्रिक मापन, ट्रायेज, एपेटाइट टेस्ट, सुपर केरल प्लसको प्रयोग तथा कुपोषण उपचारमा प्रयोग हुने खाद्य सामग्रीको व्यवस्थापन र आपूर्तिका विषयमा समेत अभ्यास गराइएको थियो।
तालिम उद्घाटन गर्दै स्वास्थ्य कार्यालय बाँकेकी प्रमुख सुनिता पौडेलले कुपोषण न्यूनीकरणका लागि पोषणयुक्त खानासँगै समयमै पहिचान र उचित उपचारमा जोड दिनुपर्ने बताइन्। पोषण फोकल पर्सन बसन्ती मल्लले कुपोषणको अवस्था पहिचान गरी तथ्यमा आधारित रणनीति कार्यान्वयन गर्न स्वास्थ्यकर्मीको भूमिका महत्वपूर्ण रहेको बताइन्।
तालिमका विभिन्न सत्र हेलन केलर इन्टरनेशनलका फिल्ड अफिसर लीलबहादुर नेपाली र बाँके युनेस्को क्लबका कार्यक्रम संयोजक दृष्टि शाहले सहजीकरण गरेका थिए। तालिम अद्यावधिक निर्देशिका, मापदण्ड तथा प्रोटोकलअनुसार सञ्चालन गरिएको आयोजकले जनाएको छ।
तालिमबाट स्वास्थ्यकर्मीको प्राविधिक क्षमता बढ्नुका साथै समुदायमा कुपोषित बालबालिकाको समयमै पहिचान, उपचार, रेफरल, परामर्श र फलोअपलाई थप प्रभावकारी बनाउन सहयोग पुग्ने अपेक्षा गरिएको छ।
Discussion about this post