बाँके, साउन २४ गते ।
सुशील कोइराला प्रखर क्यान्सर अस्पताल खजुराले एक्सरे र प्रयोगशाला सेवा २४ घण्टा सञ्चालनमा ल्याएको छ। बिरामीको बढ्दो चाप र आवश्यकतालाई ध्यानमा राख्दै सेवा विस्तार गरिएको अस्पतालले जनाएको छ।
अस्पतालका प्रमुख कार्यकारी निर्देशक डा. नीरज भट्टराईका अनुसार क्यान्सरका बिरामीको चाप बढेपछि एक्सरे सेवा २४ घण्टा सञ्चालनमा ल्याइएको हो। सिटी स्क्यान सेवा भने बिहान ८ बजेदेखि राति ८ बजेसम्म सञ्चालन हुनेछ।
अन्य एक्सरे सेवा २४ घण्टा उपलब्ध हुने भए पनि जनशक्ति अभावका कारण भिडियो एक्सरे सेवा भने पूर्ण रूपमा विस्तार गर्न नसकिएको डा. भट्टराईले बताए। उनका अनुसार हाल अतिरिक्त समयका लागि जनशक्ति व्यवस्थापन गरेर भिडियो एक्सरे सेवा सञ्चालन भइरहेको छ।
‘रेडियोलोजी विभागका लागि आवश्यक जनशक्ति माग गरिएको छ,’ उनले भने, ‘जनशक्ति उपलब्ध भएपछि भिडियो एक्सरे सेवा पनि थप सहज र नियमित बनाइनेछ।’
अस्पतालले पछिल्लो समय विभिन्न सेवाको पहुँच र व्यवस्थापन सुधार गर्दै आएको जनाएको छ। अस्पतालको फार्मेसी सेवा विस्तार गरी केमो वार्डबाटै केमो फार्मेसी सञ्चालनमा ल्याइएको छ।
अशक्त, अपाङ्गता भएका व्यक्ति, ज्येष्ठ नागरिक तथा आकस्मिक र शल्यक्रियाका बिरामीका लागि फार्मेसीमा छुट्टाछुट्टै काउन्टरको व्यवस्था गरिएको अस्पतालले जनाएको छ।
त्यस्तै, बिरामीका कुरुवाका लागि लायन्स क्लबको सहयोगमा अत्याधुनिक कुरुवा घर निर्माण गरी सञ्चालनमा ल्याइएको छ।
लामो समयदेखि बिग्रिएर थन्किएका ४० भन्दा बढी स्वास्थ्य उपकरण राष्ट्रिय आविष्कार केन्द्रका प्राविधिकको सहयोगमा मर्मतसम्भार गरी पुनः सञ्चालनमा ल्याइएको अस्पतालले जनाएको छ।
चितवनदेखि पश्चिम नेपालमा रहेको प्रमुख क्यान्सर अस्पतालका रूपमा खजुरास्थित उक्त अस्पतालमा लुम्बिनी, कर्णाली र सुदूरपश्चिम प्रदेशका साथै सीमापारि भारतबाट समेत बिरामी उपचारका लागि आउने गरेका छन्।
Discussion about this post