खोजखबर संवाददाता बाँके पुस १० गते ।
धान बजारको भन्दा राम्रो मूल्य पाइने भएपछि खाद्य व्यवस्था तथा व्यापार कम्पनी लिमिटेड नेपालगन्जमा धान विक्री गर्ने किसानहरुको घुइँचो लागेको छ ।
नेपालगन्जको कारकाँदोस्थित लिमिटेडको कार्यालयमा धान वेच्ने किसानहरुको थामि नसक्नु भीड छ । राप्तीसोनारी, नरैनापुर, डुडुवा, जानकी गाउँपालिकाबाट किसानहरुले ट्याक्टर, लडियालगायतमा धान लगेर लिमिडेटमा पुग्ने गरेका हुन् ।
धान विक्री गर्न उनीहरुलाई हप्तादिन सम्म पालो कुर्नु पर्ने अवस्था छ ।
कति किसानहरु त साँझ विहानको जोहो समेत गरेर धान खरिद केन्द्रमै रात विताउने गरेको बताउँछन् । ग्रामिण क्षेत्रमा धानको मुल्य किसानले सोचेजस्तो नपाएको हुनाले खाद्य व्यवस्था तथा व्यापार कम्पनी लिमिटेड नेपालगन्जमा बेच्न ल्याउने गरेको किसानहरु बताउँछन् ।
पोहोर सालको भन्दा यस बर्ष धानको मुल्य ठिकै रहेको हरिराम थारुले बताउनुहुन्छ ।
किसानले गरेको मेहनेत यस बर्ष ठिकै पाएको बताउछन् ।
धानको मुल्य बृद्धि भएपछि खाद्य व्यवस्था बिभागमा धान राख्ने ठाउँ नभएको लिमिटेडले बताएको छ । यसअघि विचौलियाका कारण किसानहरु सस्तोमा धान विक्री गर्न बाध्य थिए ।
तर अहिले सरकारले नै मूल्य बढी दिएर धान खरिद गर्न थालेपछि किसानहरु व्यापारीलाई छाडेर कम्पनीमा ओइरिएका हुन् ।
गतसाल नजिकैको धान केन्द्रमा सस्तो मुल्यमा बेच्न बाध्य भएका किसान जवाद खान यसबर्ष राम्रो मुल्य पाएको बताउनुहुन्छ ।
यस बर्ष मौसमले पनि साथ दिएको हुनाले धान बढि समेत भएको उहाँले बताउनुभयो । हरेक बर्ष गाउँमै विक्री गर्दै आएको धान यस बर्ष खाद्य व्यवस्था मै विक्रि गर्न ल्याएको जानकारी गराउनुभयो ।
कार्तिक महिनादेखि धान किन्न सुरु गरेको कम्पनीले अहिलेसम्म ३० हजार क्वीन्टल धान खरिद गरिसकेको छ । ४० हजार क्वीन्टल धान खरिद गर्ने लक्ष्य कम्पनीको छ । कम्पनीले मोटा धान २ हजार ५ सय ३२ रुपैयाँ क्वीन्टल र मध्यम धान २ हजार ६ सय ७३ रुपैयाँ क्वीन्टलमा खरिद गरिरहेको जनाएको छ ।
हरेक साल किसानले मुल्य नपाएको गुनासो गरिरहदा यस बर्ष किसानले धानको मुल्य ठिकै रहेको हुनाले सन्तुष्ट रहेको बताउछन् ।
Discussion about this post