नेपालगन्ज २६ पुष
बाँकेको नेपालगन्जमा हुने माघ महोत्सव कार्यक्रमको तयारी पुरा भएको छ । एकदिने माघ महोत्सव कार्यक्रममा २० बढि राष्ट्रिय स्तरका कलाकार एकैदिनमा आउने भएका छन् । कार्यक्रममा उनिहरुले राष्ट्रिय तथा स्थानिय थारु कलाकारहरुको बेजोड प्रस्तुती समेत देखाउने छन् । थारु समूदायको महान पर्व माघे सक्रान्ति (नयाँ बर्ष माघ) को अवसरमा नेपालगञ्जमा ‘माघ महोत्सव कार्यक्रम भव्य रुपमा मनाउने भएको छ । यही पुष २७ गते नेपालगञ्जमा ‘माघ महोत्सव’ कार्यक्रमको आयोजना गरी माघ महोत्सव (माघे सक्रान्ति) मनाउन लागेको हो ।
करिब १ दर्जन थारु समूदायका हक हित र अधिकारका क्षेत्रमा काम गर्ने थारु संघ–संस्थाको सयुक्त आयोजनामा ‘माघ महोत्सव’ कार्यक्रमको आयोजना गर्न लागिएको हो । ‘माघ महोत्सव’ कार्यक्रममा थारु समुदायको सांस्कृतिक नाच जस्तै, झुम्रा नाच, लठ्ठहवा नाच, हुरदुङग्वा नाच, छोक्रा नाच, मयुर नाच, दफ नाच प्रस्तुत गरिनुका साथ राष्ट्रिय तथा स्थानिय थारु कलाकारहरुको बेजोड प्रस्तुती रहने आयोजक टिमले जनाएको छ । त्यस्तै, कार्यक्रममा थारु परिकारहरु, ढिक्री, घोँघी, खुर्सानीको चटनी, बंगुरको मासु, जाँडको झोलको स्वादसमेत लिन सकिने प्रचार प्रसार समितिका संयोजक भगतराम थारुले जानकारी गराउनुभयो ।
कार्यक्रममा थारु कला संस्कृति र थारु समुदायको लागि योगदान पु¥याएका ५ जना व्यक्तिलाई सम्मान समेत गरिने भएको छ । माघ महोत्सव कार्यक्रममा आउने कलाकार विवश चौधरी, विश्वसागर परियार, करन चौधरी, राम थारु, सुनिता दहित, सुमित्रा चौधरी, राधा चौधरी, खेम भौगरिया, सोहनलाल थारु, प्रमिला थारु, सत्यनारायण चौधरी (फेटारा) देवदास, सविना चौधरी, निरमला चौधरी, राजकुमार चौधरी, संन्जिता चौधरी लगायत २ दर्जन बढि कलाकारहरुको प्रस्तुती रहने छ । कार्यक्रमको उद्घाटन राप्तीसोनारी गाउँपालिकाका प्रमुख लाहुराम थारुले गर्नुहुने छ । यस्तै कार्यक्रम उद्घाटन हुनुभन्दा पहिले धम्बोझी चोकदेखि प्रभात फेरी समेत निकाल्ने आयोजकले जनाएको छ । धम्बोझी देखि निस्कने प्रभातफेरी, सेतुविक चोक, न्युरोड, त्रिवेणीमोड, त्रिभुवन चोक हुदै भेरी प्राविधिक शिक्षालय नेपालगन्जमा पुग्ने आयोजक समितिका संयोजक बासमति चौधरीले बताउनुभयो ।
Discussion about this post