बर्दिया चैत्र २१ गते । मुलुक भरी अहिले लक डाउन भएको बेला ज्याला मजदुरी गरेर खानाको जोहो गर्ने परिवारका सदस्यहरु भोकभोकै नहुन भनेर चामल, दाल, तेल र नुनु घरमै पुगेर पुर्याउन थालिएको ठाकुरबाबा नगरपालिकाका नगरप्रमुख घननारायण श्रेष्ठले जानकारी दिए ।
नगरपालिकाले विपन्न परिवारलाई प्रति सदस्य ३ किलो चामल, प्रति घरपरिवार २ किलो दाल, १ लिटर तेल र १ किलो नुन सहयोग प्रदान गर्न थालेको नगरपालिकाले जनाएको छ । हालसम्म नगरका झण्डै १३ सय व्यक्तीहरुलाई राहत प्रदान गरिएको ठाकुरबाबा नगरपालिकाका नायब सुब्बा चक्रपाणी आचार्यले जानकारी दिए ।बर्दियामा संवाद समुहको आग्रह अनुसार विपन्नलाई खाद्यान्न वितरण गर्ने पहिलो पालिका ठाकुरबाबा नगरपालिका र बढैयाताल गाउँपालिका हो । विपन्न परिवारको पहिचान गरि लकडाउनका बेला साँझ विहानको छाक ज्याला मजदुरी गर्नेहरु र घरमा खाद्यान्न सकिएकाहरुको पहिचान गरि खाद्यान्न सहयोग गर्न संवाद समुह बर्दियाले आग्रह गरेको थियो ।संवाद समुह सहजकर्ता सहित समाजसेवीको सोही आग्रह अनुसार पालिकाले आकस्मीक बैठक बोलाएर विपन्नलाई खाद्यान्न वितरण गर्न सुरु गरेको हो ।
अन्य पालिकाले पनि विपन्नलाई खाद्यान्न सहयोग गर्न तयारी थालेको जनाईएको छ । विपन्न परिवारलाई खाद्यान्न सहयोग गर्ने काम ठाकुरबाबा नगरपालिकाका ९ वटै वडामा सुरु गरिएको छ । वडाका जनप्रतिनिधीहरुले आफ्नो वडामा ज्याला मजदुरी गरेर खाने अति विपन्न परिवारको पहिचान गरेका छन् ।ठाकुरबाबा नगरपालिकाका नगरप्रमुख अघि अघि र पछि पछि सामान बोकेको ट्याक्टर जनप्रतिनिधीहरुले संकलन गरेको लगतको आधारमा विपन्न परिवारको घरमै पुगेर खाद्यान्न सहयोग गर्न थालिएको ठाकुरबाबा नगरपालिकाका नगरप्रमुख घननारायण श्रेष्ठले बताए। ‘चुनावका बेला घरघर पुगेर भोट मागेका हामीले जनता संकटमा पर्दा घरमै पुगेर सहयोग गर्नु हाम्रो दायित्व हो ।’ नगरप्रमुख श्रेष्ठले भने ।नगरपालिकाका सबै वडामा अति विपन्न परिवारको पहिचान गरी गाउँगाउँ पुगेर खाद्यान्न सहयोग गर्न थलिएको हो । यस्तो संकटका बेला नगरपालिकाबाट खाद्यान्न सहयोग पाउँदा निकै राहत महशुस भएको स्थानियले बताएका छन् । बिषेश गरि बर्दियाका सुकुम्बासी, भुमीहिन र मुक्तकमैया बस्तीमा यस्तो संकट पैदा भएको छ । उनिहरु राहत पाएसंगै खुसी भएका छन् ।
यसैगरी बढैयाताल गाउँपालिकामा पनि विपन्न परिवारलाई खाद्यान्न वितरण कार्य जारी रहेको छ । अहिले गाउँपालिकाका वडा नम्बर ७, ८ र ९ का झण्डै १ सय ९६ घरपरिवारलाई प्रति परिवार २५ केजीका दरले चामल वितरण गरिरएको बढैयाताल गाउँपालिकाका प्रमुख प्रशासकिय अधिकृत अर्जुन सुबेदीले बताए । यस्तै प्रतिपरिवार २ लिटर तेल, १ केजी नुन, ५ केजी आलु र अन्य सामाग्री खरिदका लागी नगद १ हजारका दरले वितरण गरिएको र बाँकी वडाहरुमा क्रमश राहत वितरण गरिने उनले बताएका छन् ।
Discussion about this post