टेकेन्द्र विश्वकर्मा सुर्खेत चैत २६ गते । कर्णाली प्रदेश सभा सदस्य दानसिंह परियारले सुर्खेतमा अलपत्र अबस्थामा रहेका बिरामीको उद्धार गरेका छन् । मुगु क्षेत्र नं. १ (क) बाट नेकपाका प्रत्यक्ष निर्वाचित सांसद परियारले घर फर्कन नपाउँदै सुर्खेतमा अलपत्र परेका आफ्नै निर्वाचन क्षेत्रका बिरामीको उद्धार गरेका हुन् ।
कर्णाली प्रदेश सभा सदस्यहरुमध्ये सबैभन्दा कान्छा उमेरका सांसद परियारले आफैले खर्च व्यहोरेर एम्बुलेन्स मार्फत दुइ जना बिरामीलाई आज मुगु पठाएका हुन् ।
विश्वभर फैलिएको कोरोना भाइरस नियन्त्रणका लागि सरकारले गरेको लकडाउनका कारण उपचारमा आएका छायानाथ रारा नगरपालिका-१३ लुम गाउँका डिल बहादुर कामी र छायानाथ रारा नगरपालिका -१० झाकोटका सुर बहादुर नेपालीलाई उद्धार गरी मुगु पठाएका हुन् ।
१५ दिनदेखी सुर्खेतको देउती अस्पतालमा उपचाररत नेपाली र नेपालगन्जको भेरी अस्पतालमा पेट सम्बन्धी रोगको उपचार गराई घर फर्कन लागेका कामी लकडाउनका कारण सुर्खेतमा अलपत्र परेका थिए । ‘हामीसँग भएको सबै पैसा उपचारमा सकियो, नेपालीले भने,अस्पतालमा बस्दा झनै खर्च बढ्यो।’ ‘माननीय ज्यूले ४५ हजार निजी खर्च गरेर हामीलाई मुगु पठाई दिनु भएको छ । उहाँलाई सधैं जनताले साथ दिइनै रहनेछन् ।’
आर्थिक अवस्था कमजोरीका कारण आफू गमगढी पुग्न नसक्ने अवस्थामा रहेका बेला सांसद परियारले गरेको सहयोग जीवनमा भूल्न नसक्ने नेपालीले बताए । मुगुमै सडक दुर्घटनामा परि घाईते भएका नेपाली १५ दिनदेखि देउती अस्पतालमा उपचाररत थिए । अलपत्र अबस्थामा रहेका दुवै जनालाई सांसद परियारले उद्धार गरेका हुन ।
मैले नीजि खर्चमा उहाँ दुबै जनालाई घर पुग्नको लागि एम्बुलेन्सको व्यवस्था गरि पठाईदिएको छु ।’ सांसद परियारले भने, ‘यस अघि पनि अलपत्र परेका सयौं मुगाली जनतालाई उद्धार गरी मुगु पठाइसकेको छु ।’
Discussion about this post